Elvin Cəfərquliyev: “Döyüşdük, vuruşduq və meydanı başıaşağı tərk etmədik”

“İlk növbədə sizləri, bütün Azərbaycan xalqını təbrik edirəm. “Çelsi” ilə bərabərə qaldıq. Lakin bu heç-heçə qələbəyə bərabərdir”.

Futbolxeber.az saytının məlumatına görə, bu sözləri “Qarabağ”ın müdafiəçisi Elvin Cəfərquliyev UEFA Çempionlar Liqasının Liqa mərhələsinin 4-cü turunda “Çelsi”yə qarşı keçirilən oyun (2:2) barədə danışarkən deyib.

O, “Qarabağ”ın günü-gündən irəli getdiyini bildirib: “Komandamız çox inkişaf edib, çox böyüyüb. “Qarabağ” elə bir səviyyədədir ki, “Çelsi” üzərində qələbəyə də yaxın idik. Komanda olaraq çox yaxşı oyun keçirdik”.

25 yaşlı müdafiəçi azarkeşlərə də təşəkkürünü bildirib: “Bilirdik ki, rəqib yüksək pressinq tətbiq edir. Oyun boyu bizə çətinlik yaradırdılar. Buna baxmayaraq, hər şeyin öhdəsindən gəldik. Şükür Allaha ki, döyüşdük, vuruşduq və meydanı başıaşağı tərk etmədik. Azarkeşlərimizədə təşəkkür edirəm ki, bizi tək qoymadılar. Onların dəstəyi möhtəşəm idi”.

Cəfərquliyev qeyd edib ki, rəqibi “Çelsi” olsa da, meydana inamlı çıxmışdı: “Həmişəki kimi özümə güvənirdim. Rəqibin mənim üçün fərqi yoxdur. Əsas odur ki, meydana çıxıb öz oyunumu göstərim. “Çelsi” ilə matçda da bunu bacardım. Ulduz futbolçulara qarşı çox oyunlarım olub. Bu dəfə də özümə inamlıydım”.

“Qarabağ”ın üzvü “Çelsi” kimi komandaya qarşı inamlı oyundan sonra Avropa klublarının maraq dairəsinə düşməsi ilə bağlı sualı da cavablandırıb: “O barədə menecerimlə danışığım olmayıb. Maraq ola bilər. Lakin maraq olması o demək deyil ki, hansısa kluba transfer olunuram. Təklifin real olması üçün menecerimlə danışmalıdılar, təbii ki, mən razılıq verməliyəm. Nə vaxtsa oturub bu barədə söhbət etməyə dəyər”.

TAĞI