Kayahan demiş, multFİLM GİBİ YANİ...

AFFA-nın saytında 08.09.2025-ci ildə “Fernandu Santuşla yollar ayrılıb” başlıqlı xəbər yayımlandı. Xəbərin son cümləsi belə idi: “Millimizi DÇ-2026-nın seçmə mərhələsində Ukrayna yığması ilə oyuna U-21 komandamızın baş məşqçisi Ayxan Abbasov çıxaracaq”.

Bu gün - 30.09.2025-ci ildə AFFA-nın saytında növbəti xəbər yayımlanır: “AFFA prezidenti Ayxan Abbasovla görüşüb”.

Xəbərdə qeyd olunub ki, “Bu gün AFFA-nın prezidenti Rövşən Nəcəf A milli komandamızın baş məşqçisi Ayxan Abbasovla görüşüb”. Daha sonra qeyd edilib: “AFFA prezidenti Ayxan Abbasovla komandamızın qarşıdakı oyunları ətrafında fikir mübadiləsi aparıb. Rövşən Nəcəf milliyə və baş məşqçiyə AFFA rəhbərliyi tərəfindən dəstəyin bundan sonra da davam etdiriləcəyini bildirib, komandamıza növbəti oyunlarda uğurlar arzulayıb”.

Belə çıxır ki, Ayxan Abbasov milli komandamızın baş məşqçisidir. Amma bunu AFFA nə vaxt açıqladı? İcraiyyə Komitəsi bu barədə nə zaman qərar qəbul etdi? İcraiyyə Komitəsinin iclaslarını gizli keçirən AFFA, deyəsən, daha iclasın nəticələri barədə də məlumat vermir. Necə deyərlər, özləri yığışıb, özləri qərar verirlər, heç kimə də məlumat vermirlər. Elə baş məşqçi məsələsi də bir daha bugünkü AFFA-nın necə “peşəkar səviyyədə” idarə olunduğunu göstərir.

Biz bildiyimiz qanunlarla milli komandanın baş məşqçisini AFFA-nın İcraiyyə Komitəsi təsdiqləməlidir. Yığma istənilən mütəxəssisə həvalə oluna bilər, lakin bunun üçün AFFA İcraiyyə Komitəsinin qərarı olmalıdır. AFFA-nın saytında Rövşən Nəcəfin Ayxan Abbasovla görüşü barədə paylaşılan xəbərdə ən azından qeyd etməliydi ki, milli komandanın baş məşqçi vəzifəsi müəyyən vaxta qədər (seçmə mərhələnin sonuna qədər, hansısa təqvim gününə qədər və s.) Ayxan Abbasova həvalə olunur. Çünki AFFA prezidenti, vitse-prezidentlər, yaxud baş katibin təkbaşına milli komandaya baş məşqçi təyin etmək səlahiyyəti yoxdur.   

Bəs əslində vəziyyət necədir?

Təvazökarlıqdan uzaq olsa da, əksəriyyət “Qurban Qurbanovla danışıqlar başladı”, “Rəşad Sadıqov AFFA ilə razılığa gəldi” və s. tipli xəbərlər tirajlayanda biz hələ sentyabrın 12-də, “Ayxan Abbasov ilin sonuna kimi millidə qalır, sonra isə...” başlıqlı xəbər (https://futbolxeber.az/news/country/89421) dərc etmişdik. Xəbərdə də qeyd olunmuşdu ki, Ayxan Abbasov ilin sonuna kimi millidə qalacaq, yeni ildən isə yığma əcnəbi mütəxəssisə tapşırılacaq...