Bəhlul Mustafazadə: “İslandiyaya məğlubiyyətdən sonra toparlanmaq çətin oldu”

“Ayxan müəllim komandaya özünəinamı geri qaytarmağa çalışdı. Bu barədə çox söhbətimiz oldu. Bütün bunlar komanda şəklində bizə müsbət təsir elədi”.

Futbolxeber.az saytının məlumatına görə, bu sözləri milli komandamızın müdafiəçisi DÇ-2026-nın seçmə mərhələsi çərçivəsində Ukraynaya qarşı keçirilən görüş (1:1) barədə danışarkən deyib.

O, “Komanda keçmiş oyunlarda niyə bu cür təsir bağışlamırdı?” sualını belə cavablandırıb: “Bu haqda o qədər də danışmaq istəmirəm. Fernandu Santuş artıq gedib və indi nəsə demək etik deyil. Ayxan müəllim uşaqları daha yaxşı tanıyır. İslandiyaya məğlubiyyətdən sonra toparlanmaq çətin oldu. Çox çalışırdıq. Ukraynanı analiz etmişdik. Hər kəs meydanda əlindən gələni edirdi. Sevinirəm ki, meydandan xalla ayrıldıq”.

Təcrübəli müdafiəçi millinin yeni baş məşqçisinin yerli, yoxsa əcnəbi mütəxəssis olması ilə bağlı fikir bildirməkdə çətinlik çəkib: “Bu, mənim səlahiyyətimdə deyil. Sadəcə onu deyə bilərəm ki, Ayxan müəllimin sistemi bizə uyğun gəldi. Qısa müddətdə də olsa, düşüncələrini çatdıra bildi. Ukraynaya qarşı oyunumuz çox yaxşı alındı. Uşaqlar hara düşmək lazım olduğunu bilirdilər”.

Fərəc Aslanov