“Araz-Naxçıvan”ın qələbəsi ad günümdə qol vurmağımdan daha vacibdir”

“Araz-Naxçıvan”ın yarımmüdafiəçisi Şarl Bolinin Futbolxeber.az saytına müsahibəsi

- Fasilə öncəsi Premyer Liqanın üçüncü turunda “Qəbələ” üzərində 2:1 hesablı qələbə qazandınız. Görüş barədə nə deyə bilərsiniz?

- Yaxşı oyun alındı. Rəqib də zəif deyildi. Bununla belə, qələbəyə “Qəbələ”dən daha çox layiq olduğumuzu düşünürəm. Lakin bundan da yaxşı oynamalıyıq.  

- Fasilədən sonra “Araz-Naxçıvan” daha ehtiyatlı oynamağa başladı. Bu, nədən irəli gəlirdi?

- Rəqib fasilədən sonra daha çox təzyiq edirdi. Biz kompakt çıxış etdik. Diqqəti əldən vermədik. Daha çox müdafiəyə diqqət ayırır, rəqibi əks-hücumda yaxalamağa çalışırdıq.  

- 3 oyuna 7 xal. Startı “Araz-Naxçıvan” üçün uğurlu hesab etmək mümkündür?

- Əlbəttə, 3 oyuna 7 xal yaxşı nəticədir. Start alındı deyə bilərik. Amma bununla kifayətlənmək olmaz. Növbəti matçlarda da qələbə qazanmalıyıq.

- “Qəbələ” ilə görüş ad gününüzə təsadüf edirdi. Yəqin ki, 27 yaşınızı qolla qeyd etmək istəyirdiniz...

- Bəli, qol vurmaq istərdim. Ümumiyyətlə, hər matçda fərqlənmək istəyirəm. Amma alınmadı. Bununla belə, üzülmürəm. Çünki komandamın qələbəsi ad günümdə qol vurmağımdan daha vacibdir. Kimin fərqlənməsi önəmli deyil. Əsas olan komandanın uğurudur.

- Artıq 3 tur geridə qalıb. Azərbaycan çempionatının səviyyəsini necə qiymətləndirirsiniz?

- Çempionatın səviyyəsi yüksəkdir. Hər matç çətin alınır. Heç bir komanda təslim olmur. Demək olar ki, bütün oyunlarda sona qədər gərgin mübarizəyə şahidlik edirik.

- Çempionatın əsas favoriti “Qarabağ” Çempionlar Liqasının Liqa mərhələsinə vəsiqə qazandı. “Araz-Naxçıvan” bu komanda ilə mübarizə apara bilər?

- “Qarabağ”ın gücü hamıya məlumdur. Bununla belə, təkcə bu komandanı fərqləndirmək olmaz. Çempionatda yaxşı kollektivlərin sayı az deyil. Favoritlər bir yana, elə son matçda qalib gəldiyimiz “Qəbələ” də zəif deyildi.

İbrahim Cəfərov