Abbas Hüseynov: “ÇL-də ən yaxşısını edəcəyik”

“Çox ağır oyun oldu. Hava şəraiti, meydançanın süni olması işimizi çətinləşdirmişdi. Lakin şükürlər olsun ki, çətin qarşılaşmadan qələbə ilə ayrıldıq”.

Futbolxeber.az saytına müsahibəsində bu sözləri “Qarabağ”ın müdafiəçisi Abbas Hüseynov Azərbaycan Premyer Liqasının üçüncü turunda səfərdə “Karvan”a 2:0 hesabı ilə qalib gəldikləri oyun barədə danışarkən deyib.

O, matçın keçirildiyi Şamaxı stadionunun qazonunun süni olmasının hər iki komandaya çətinlik yaratdığını bildirib: “Əlbəttə, süni qazonda, özü də isti havada mübarizə aparmaq çox çətindir. Söhbət təkcə “Qarabağ”dan getmir. Bu, istənilən kollektivə çətinlik yaradır. Rəqib komandada dostlarım var. Söhbətimiz zamanı onlar da süni qazonda oynamağın çətinliyini qeyd etdilər”. 

30 yaşlı futbolçu Çempionlar Liqasının Liqa mərhələsindəki rəqiblərdən də söz açıb: “Oyunlar çox ağır olacaq. Rəqiblərimiz çox güclüdürlər. Hansısa birini fərqləndirmək olmur. Hər rəqib güclüdür. Bununla belə, inanıram və ümid edirəm ki, ÇL-də ən yaxşısını edəcəyik. Hər komanda ilə başabaş oynaya bilərik. “Bayer”ə qarşı istər Bakıda, istər Leverkuzendə necə mübarizə apardığımızı yəqin ki, xatırlayırsınız. Həmin görüşlərdə qələbəyə layiq idik. İndi də başımızı aşağı salmırıq. Daim irəli gedirik”.

A.Hüseynov milli komandamızın qarşıdakı matçlarına da toxunub: “Milliyə dəvət aldığım üçün sevinirəm. Ümumilikdə “Qarabağ”dan milliyə 7 futbolçu çağırılıb. Baş məşqçi bizə inanır. Çox istərdim ki, qarşıdakı matçlarda qələbə qazanaq və xalqımızı sevindirək. İnanıram ki, səfərdə İslandiyaya qarşı yaxşı oyun nümayiş etdirəcəyik və vətənə uğurlu nəticə ilə qayıdacağıq”.

Fərəc Aslanov