Roberto Olabe: “Son tura qədər çempionluq üçün döyüşəcəyik”

“Turan Tovuz”un yarımmüdafiəçisi Roberto Olabenin Futbolxeber.az saytına müsahibəsi

- Azərbaycan Premyer Liqasının üçüncü turunda səfərdə “Neftçi”yə 1:0 hesabı ilə qalib gəldiniz. Görüşdə bağlı nə deyə bilərsiniz?

- Qələbə qazandığımız üçün xoşbəxtik. Səfərə 3 xal üçün gəlmişdik. Qələbəyə baxmayaraq, öz üzərimizdə daha da işləməliyik. Xeyli boşluqlarımız var. Milli komandaların oyunu öncəsi yaranmış fasiləyə 3 xal qazanaraq yollanmağımız olduqca vacib idi.

- Vurduğunuz qol bir qədər gözlənilməz alındı. Həmin epizodu necə şərh edərdiniz?

- Ola bilər bir qədər gözlənilməz olsun. Bununla belə necə olur olsun, əsas odur ki, fərqlənməyi bacarmışam. Vurduğum qol komandaya 3 xal qazandırdı. Ona görə də bunun elə bir fərqi yoxdur.

- Ötən turdakı “Araz-Naxçıvan” məğlubiyyətindən sonra “Neftçi” ilə görüşə köklənmək nə dərəcədə çətin idi?

- Əlbəttə, "Neftçi" yaxşı oyunçulara sahibdir. Onlar bizimlə matçda baxımlı oyun nümayiş etdirdilər. Ona görə də qarşılaşma çətin alındı. Bilirdik ki, "Neftçi"yə qarşı səfərdə oynamaq ağır olacaq. Bununla belə, qələbə qazana bildik.

- Komandanızın ilk 3 turdakı çıxışını necə qiymətləndirirsiniz?

- Nəticələrimizi günbəgün yaxşılaşdırırıq. Heyətdə keyfiyyətli futbolçularımız var. Düşünürəm ki, belə davam etsək, daha böyük nəticələr qazana bilərik.

- “Turan Tovuz”un qarşısına çempionluq hədəfi qoyulub, komandanın bu vəzifənin öhdəsindən gəlməsi nə dərəcədə realdır?

- Niyə də yox? Hamımız bunu arzulayırıq. Çempion olmaq üçün öz üzərimizdə işləyirik. Ona görə də Premyer Liqanın son turuna qədər çempion olmaq üçün döyüşəcəyik.

- Azərbaycan Premyer Liqasının səviyyəsini necə dəyərləndirirsiniz?

- Çempionat olduqca gərgindir. Hər matçda rəqabətlilik səviyyəsi olduqca yüksəkdir. Bu çempionatda əzmkarlıq, sürət var. Topla oynamaq baxımından yüksək texnika nümayiş etdirilir. Azərbaycan çempionatında çıxış etmək olduqca vacib və yaxşı bir təcrübədir.

- Daha əvvəl Madrid “Atletiko”sunda oynadığınızı nəzərə alsaq, "Land of fire Azerbaijan" ifadəsi sizə nəsə deyir?

- Əlbəttə, çox şey deyir. Bilirəm ki, vaxtı ilə “Atletiko” və Azərbaycan arasında əməkdaşlıq olub. Bu ifadə mənim üçün də olduqca önəmlidir. Günbəgün burada olduqca bunun mənasını daha yaxşı anlayıram.

Azad Nuriyev