Kevin Medina: “Santiaqo Bernabeu”da oynamaq istərdim”

“Qarabağ”ın müdafiəçisi Kevin Medinanın Futbolxeber.az saytına müsahibəsi

- Pley-off mərhələsinin cavab görüşündə uduzsanız da, ümumi nəticədə qələbə qazanmaqla Çempionlar Liqasının Liqa mərhələsinə yüksəldiniz. Qarşılaşma barədə nə deyə bilərsiniz?

- Matç həm zövqverici, həm də olduqca çətin keçdi. Onlar qələbə üçün bura gəlmişdilər, "Ferensvaroş" son dəqiqəyə qədər döyüşdü. Amma biz də onlardan geri qalmırdıq. Bu matça xüsusilə yaxşı hazırlaşmışdıq.

- Penalti epizodu ilə bağlı bağlı fikirləriniz necədir? Hakim qərarında haqlı idi?

- Penalti epizodu olduqca mürəkkəb məqam idi. Mən necəsə topa toxunmağa çalışdım. Amma nəticədə belə alındı. Bu cür epizodlar növbəti oyunlar üçün sənə təcrübə qazandırır. Belə mübarizələrdə nə etməli olduğunu, necə diqqətli oynamaq lazım olduğunu anlayırsan. Bu, futboldur, bir dəqiqəlik topa nəzarəti itirsən, belə vəziyyətlə üzləşmək qaçılmaz olur.

- Azarkeşlərə nə demək istərdiniz?

- Onlara deməyə söz tapa bilmirəm. Azarkeşlər bu gün fantastik idi. Düşünürəm ki, stadionda olan hər kəs matçdan zövq aldı. Biz onların üzünü güldürmək üçün çox çalışdıq. Azarkeşlər bu sevinc dolu dəqiqələri uzun müddətdir gözləyirdi. Bizi dəstəkləməyə gələn hər kəs 90 dəqiqə bizim üçün əllərindən gələni etdilər. Onların dəstəyi bizə əlavə güc ötürürdü. Bu dəstəyin sayəsində qalib gəldik. Həqiqətən, möhtəşəm gecə idi.

- Artıq Çempionlar Liqasının əsas mərhələsindəsiniz. Hansı hisslər keçirirsiniz?

- Hazırda bu anlardan zövq alırıq. Günün sonunda bu nəticəni ağır əziyyətimizin hədiyyəsi, bəhrəsi olaraq qəbul edirik. Əsas mərhələdəyik, üzərimizə düşən vəzifə rəqiblərin adları məlum olana qədər gözləməkdir. Çempionlar Liqası hamının çıxış etmək istədiyi bir turnirdir. Bu il, bu mövsüm biz bunu bacardıq. Hazırda isə bu anların həzzini yaşayırıq.

- Liqa mərhələsində hədəfiniz nə olacaq?

- Əsas hədəf daim mübarizə aparmaqdır. Rəqabətə tab gətirmək, rəqibin adından asılı olmayaraq sonacan döyüşməkdir. Yaxşı nəticələr əldə etməyi hədəfləyirik. Biz üzərimizə düşən məsuliyyətdən xəbərdarıq. Həmişə etdiyimizi edəcəyik. Meydana çıxıb azarkeşlərimiz üçün yaxşı nəticələr qazanacağıq.

- Çempionlar Liqasında hansı rəqiblə qarşılaşmağı daha çox istərdiniz?

- Səmimi desəm, "Real"a qarşı. Bilirsiniz, “Santiaqo Bernabeu” stadionunda oynamaq istərdim. Bu, karyeram üçün olduqca möhtəşəm, gözəl bir hiss olardı. Əlbəttə, bu turnirdə böyük klublar çıxış edir. Çempionlar Liqasında oynayırsansa, istənilən rəqiblə qarşılaşmağa hazır olmalısan. Amma zənnimcə, turnirin əsas favoriti "Real"dan böyük bir klub ağlıma gəlmir. Onlarla qarşılaşmaq maraqlı olar.

Azad Nuriyev