Kipr mətbuatı: “Araz Naxçıvan” elə-belə rəqib deyil”

Kipr mətbuatı UEFA Konfrans Liqasının 3-cü təsnifat mərhələsində "Araz Naxçıvan"la "Omoniya" arasında keçiriləcək oyunlarla bağlı yazı hazırlayıb.

Futbolxeber.az-ın məlumatına görə, kathimerini.com.cy saytında dərc edilən "Omoniya" üçün əsas hədəf - əvvəl "Araz", sonra növbəti mərhələ" adlı yazıda bildirilir:

"Omoniyada prioritet tam olaraq bəllidir: əvvəlcə "Araz" (“Araz Naxçıvan” - red.), daha sonra növbəti rəqib barədə düşünüləcək. “Yaşıllar” bütün diqqətini Azərbaycan təmsilçisi ilə qarşıdakı oyunlara yönəldib. Komandada yaxşı anlayırlar ki, yalnız maksimum ciddiyyət və konsentrasiya ilə Konfrans Liqasının pley-off mərhələsinə yüksəlmək mümkündür.

Əgər "Omoniya" mərhələni adlasa, növbəti raundda PAOK və ya "Volfsberqer"lə qarşılaşacaq. Baxmayaraq ki, texniki heyətin bir nümayəndəsi artıq həmin komandaların oyunlarını izləməyə başlayıb, hazırda bütün diqqət "Araz"la dueldədir.

"Araz" elə-belə rəqib deyil. Komanda “Aris”i turnirdən kənarlaşdırmaqla təsadüfi komanda olmadığını sübut etdi. Bu fakt onların təhlükəli və diqqətəlayiq rəqib olduğunu göstərir. İndi "Omoniya" favorit statusunu sözlə yox, meydanda təsdiqləməlidir – mərhələ adlamaq üçün ilk oyunda üstünlük əldə etməlidir".

Yazıda daha sonra bildirilir: "Baş məşqçi Henning Berqin işi artıq komandada hiss olunur. Yeni transferlər hələ reallaşmasa da, o, müdafiədə kompakt, hücumda isə məhsuldar kollektiv formalaşdırmağı bacarıb. Onun "Omoniya"dakı ilk dönəminə xas olan bəzi xüsusiyyətlər – sürətli əks-hücumlar, cinahların effektiv işləməsi və oyunçular arasında qarşılıqlı anlaşma – yenidən komandanın əsas gücünə çevrilib. Tasos Xacigiovannis artıq komandaya qayıdıb və yaxın günlərdə bir neçə yeni transferin də baş tutacağı gözlənilir. Klub daxilində həm Avropada, həm də yerli arenada uğurlu mövsüm üçün nikbin ab-hava hökm sürür".

Xatırladaq ki, "Araz Naxçıvan"la "Omoniya" arasında ilk oyun avqustu 7-i Bakıda, cavab qarşılaşması avqustun 14-ü Kiprdə olacaq.