Qurban Qurbanov: “Bundan sonra bir-birlərini daha yaxşı tamamlayacaqlar”

Avstriyada təlim-məşq toplanışında olan "Qarabağ"ın baş məşqçisi Qurban Qurbanov klubun saytına açıqlama verib.

Futbolxeber.az saytının məlumatına görə, təcrübəli mütəxəssis Avstriyanın “Zalsburq” (1:2) klubu ilə keçirdikləri son yoxlama oyunu barədə danışıb.

O, komandasının hazırlıq prosesindən razı qaldığını deyib: “Yaxşı oyun oldu. Keyfiyyətli futbolçulardan qurulmuş, özünə xas oyun üslubu olan çox yaxşı bir komandaya qarşı oynadıq. Düzdür, komandamız optimal vəziyyətdə deyildi. Amma yaxşı hazırlıq keçdik. Toplanışda son oyunumuz idi. Futbolçular bu matça yüklənmiş halda çıxmışdılar. Həm son görüşdən, həm ümumi hazırlıqdan razı qaldım”.

Qurbanov komandanın ümumi durumunu da dəyərləndirib:  “Komandanın durumu normaldır. Optimal idman formasına düşmək üçün bir az vaxt lazımdır. Qarşıda oyundan-oyuna bunu hiss edəcəyik. Ümumilikdə bu gün hər futbolçunun daha yaxşı potensialı var. Bir neçə rəsmi oyundan sonra daha da idman formalarını yığacaqlar. Bundan sonra meydanda bir-birini daha yaxşı tamamlayacaqlar”.