"Qarabağ"ın "Neftçİ" üzərindəki qələbəsinin sirri bəlli oldu

Topaz Premyer Liqanın 25-ci turunda baş tutan “Neftçi” – “Qarabağ” oyunundan əvvəl maraqlı hadisə yaşanıb. Futbolxeber.az-ın Ağdam klubunun saytına istinadən məlumatına görə, “Qarabağ”ın vitse-prezidenti Tahir Gözəl klubun məşqçiləri və texniki heyətinin üzvləri ilə görüşündə baş məşqçi Qurban Qurbanovdan cari mövsümdə üçüncü dəfə “Neftçi”yə qalib gəlmələrini istəyib.
 
“Biz tarix boyu “Neftçi”ni üç dəfə ardıcıl məğlub etmişikmi” – T.Gözəlin bu sualına Qurban Qurbanov  “Derbi tarixində heç kim ardıcıl üç qələbə qazana bilməyib” – cavabını verib.

Bu zaman “Qarabağ”ın mətbuat xidmətinin rəhbəri Nurlan İbrahimov deyib: “Derbi tarixində ən böyük seriya “Qarabağ”a məxsusdur. `Qarabağ` 2006-2010-cu illər arasında `Neftçi`yə 11 oyun və ya 1873 gün məğlub olmayıb. Amma tarixboyu heç kim üç qələbə qazanmayıb”.

Bundan sonra Tahir Gözəl Qurban Qurbanova deyib ki, “Qarabağ” bir ilkə imza ataraq “Neftçi”ni ardıcıl üçüncü dəfə məğlub etməlidir.