Ölkəmizi avrokuboklarda təmsil edəcək bütün klublar məlum oldu

2025/26 mövsümündə Azərbaycanın UEFA-nın klub yarışlarındakı bütün iştirakçıları müəyyənləşib.

Futbolxeber.az saytının məlumatına görə, “Qarabağ” ölkə çempionu qismində Çempionlar Liqasında, “Sabah” kubokun qalibi kimi Avropa Liqasında, 2 və 3-cü yerləri tutan “Zirə” və “Araz Naxçıvan” isə Konfrans Liqasında yarışacaq.

“Qarabağ” Çempionlar Liqasına 2-ci, “Sabah” Avropa Liqasına 1-ci, “Zirə” və “Araz Naxçıvan” isə Konfrans Liqasına 2-ci mərhələdən başlayacaq.

“Qarabağ”, “Zirə” və “Araz Naxçıvan”ın ilk rəqibləri iyunun 18-i, “Sabah”ın rəqibi isə iyunun 17-də keçiriləcək püşkatmada məlum olacaq.

“Sabah” mübarizəyə ən tez qoşulan klubumuz olacaq. Avroliqada 1-ci mərhələnin ilk və cavab matçları 10 iyul və 17 iyulda olacaq.

“Qarabağ”ın 2-ci mərhələdə ilk matçı 22 və ya 23 iyul, cavab oyunu 29 və ya 30 iyulda keçiriləcək.

“Zirə” və “Araz Naxçıvan”ın ilk oyunu 24 iyul, cavab görüşləri 31 iyulda təşkil olunacaq.