Qurban Qurbanov: “Benzianın mövqeyinə axtarışdayıq”

“Ayxan Abbasova təşəkkür edirəm. Gənclərdən yaxşı, mübariz kollektiv formalaşdırıb. Sona kimi mübarizə apardılar, bizə xeyli çətinlik yaşatdılar. Futbolçularım sona kimi oyunun içində oldular, qopmadılar. Hər iki komanda mövsümü yaxşı notlarla başa vurdu”.

Futbolxeber.az saytının məlumatına görə, bu sözləri “Qarabağ”ın baş məşqçisi Qurban Qurbanov Azərbaycan Premyer Liqasının 36-cı turunda “Şamaxı”ya 1:0 hesabı ilə qalib gəldikləri oyundan sonra deyib.

O, kubokun finalına ciddi yanaşdıqlarını bildirib: “Həmişə ciddi olmuşuq. Əks halda, finala qədər gəlməzdik. Qarşımızda istəkli komanda var. Kuboku qazanmaq istəyirik. Necə olacağını görəcəyik”.

Təcrübəli mütəxəssis Yassin Benzia ilə danışıqların davam etdiyini bildirib: “Bütün təklifləri etmişik. Qalıb qərarını verməsi. Buna baxmayaraq, həmin mövqeyə axtarışdayıq. Aktiv danışıqlarımız var. Benzia qalacaqsa, lap yaxşı. Ola bilər karyerasını başqa yerdə davam etmək istəsin”.

Qurbanov Çempionlar Liqasına I deyil, II təsnifat mərhələsindən başlamalarının daha faydalı olduğunu vurğulayıb: “Futbolçuların istirahətə ehtiyacı var. I təsnifat mərhələsindən başlasaydıq, tələsə bilərdik. 1 aya yaxın vaxtımız olacaq və işlərimizi görməyə çalışacağıq”.

“Qarabağ”ın çalışdırıcısı Abubakar və Manfredasla danışıqlar aparmadıqlarını bildirib.

Qurban Qurbanov “Barselona”nın düşərgəsində olmasından da söz açıb: “Bütün yaş qruplarının məşqində oldum. Mütəxəssislərlə söhbətlərimiz oldu, eləcə də Fliklə. Baxmayaraq ki, geniş danışa bilmədik. “Barselona” çox böyük klubdur. Onların vaxt ayırması asan deyildi. Mənimçün ora getmək çox vacib idi. Əmin oldum ki, sistemi qurub saxlamaq çox vacibdir. Bunu icra edənlər sistemi sevməli və sadə şəkildə tapşırıqları yerinə yetirməlidir. Komandada adlı-sanlı oyunçuların olması vacib deyil. Çox şey götürdüm. Belə səfərlər böyük təcrübə, inam verir. Böyük klublarda öz komandanda istədiklərini görmək xoşdur. Maraqlı görüş alındı. Faydalı səfər oldu”.