Elmar Baxşıyev: “Avrokuboklarda uğur qazanmaq üçün heyət gücləndirilməlidir”

“Araz-Naxçıvan”ın baş məşqçisi Elmar Baxşıyevin müsahibəsi

- “Araz-Naxçıvan” tarixində ilk dəfə avrokuboklara vəsiqə qazandı. Bununla bağlı təəssüratlarınızı bilmək maraqlıdır...

- Əlbəttə, çəkdiyin əziyyətin bəhrəsini görmək, nəticəsini qeyd etmək ancaq sevinc doğurur. Biz də mövsümə uğur qazanmaq üçün başladıq, enişli-yoxuşlu yol qət etdik, yekunda vacib olan nəticəni qazandıq. Həm özümüz sevindik, həm də "Araz-Naxçıvan"ın azarkeşlərinə sevinc yaşatdıq.

- Uğurunuzun arxasında hansı amillər dayanır? Nəyin hesabına bu nəticəyə nail olduğunuzu düşünürsünüz?

- Təbii ki, bu uğurun qazanılmasında əsas amil sağlam kollektiv formalaşdıra bilməyimiz oldu. Yayda heyətə bizə kömək edəcək, komandaya xeyir verəcək futbolçular cəlb etdik. İntizama riayət etməklə və səbirlə işimizi gördük, oyunlarımızı keçirdik. Uğur heç də asan qazanılmadı. Futbolçularımız zədələndi, meydança problemi yaşadıq, ancaq bunların öhdəsindən komanda şəklində gəldik.

- Mövsüm ərzində hansı oyun və ya an sizin üçün həlledici oldu?

- Bütün oyunlar bizim üçün vacib idi. Çünki hər qələbəyə 3, heç-heçəyə 1 xal verilir. Çalışırdıq ki, qazana bilmədiyimiz oyunlarda heç-heçə edək. Yəni, matç başa çatanda qrafikimizə xal əlavə etməyə çalışdıq. Arxada qalan çempionatın 35 oyununun heç biri asan keçmədi. Hər birində futbolçular maksimum güc sərf etdilər. Ona görə də hansısa oyunu xüsusi seçmək istəməzdim.

- Komanda ilboyu müəyyən çətinliklərlə üzləşdi. Bunun öhdəsindən necə gəldiniz?

- Uğura gedən yolda çətinliklərlə qarşılaşmamaq mümkün deyil. Qələbəni necə kollektiv olaraq qeyd edir, sevinirdiksə, çətinliyi də səbirlə, bir-birimizə dəstək olmaqla dəf etdik. Komanda ruhu, intizamı bizi birləşdirdi. Buna görə futbolçularıma, həmin anlarda bizə dəstək olan rəhbərliyə təşəkkür edirəm.

- Bu mövsüm "Araz-Naxçıvan"ın oyun üslubunda nə kimi dəyişikliklər etdiniz?

- İncəlikləri sadalamaq istəmirəm. Bəlli bir oyun üslubumuz var və ona uyğun da heyət qurduq. Məşqlərdə futbolçulara nələri istədiyimizi aşıladıq və əksər matçlarda onlar bunu yerinə yetirdilər.

- Futbolçuların psixoloji hazırlığı və motivasiyası baxımından nələrə diqqət yetirdiniz?

- Yaxşı kollektivimiz var. Hər kəs öz işini vicdanla və peşəkar səviyyədə görürdü. Mövsümün gedişində ardıcıl zədələrlə üzləşdik, futbolçularımız cəzalı vəziyyətə düşdü. Ancaq uğur qazanacağımıza inanırdıq və bundan ruhlanırdıq. Ola bilər ki, qışdan sonra daha çox xal itirdik, amma qışa qədər də xalları bu komanda yığmışdı. Yəni, qarşıya yüksək yer tutmaq tapşırığı qoyulmuşdu, buna da nail olduq.

- Yəqin ki, avrokuboklar üçün heyət gücləndiriləcək. Hansı mövqelərə transferlər olacaq?

- Hələ qarşıda bir oyunumuz var. Ondan sonra rəhbərliklə görüşümüz olacaq. Həm başa çatan mövsümlə bağlı hesabat verəcəyik, həm də yeni planlar ətrafında müzakirələr aparılacaq. Əksər futbolçuların, o cümlədən mənim də müqaviləm mayın sonunda başa çatacaq. Əvvəlcə bu suala aydınlıq gətirəcəyik ki, davam edirik, yoxsa rəhbərlik fərqli fikirdədir və sair. Əlbəttə, avrokuboklarda uğur qazanmaq üçün heyət mütləq gücləndirilməlidir. İlk növbədə, müqaviləsi başa çatan futbolçularla danışıqlar aparılmalıdır.

- Konfrans Liqasında hədəflər nələrdir? Hansı mərhələyə qədər irəliləməyi düşünürsünüz?

- Bu suala tam cavab verə bilməyəcəyəm. Dediyim kimi, hər şey rəhbərliklə görüşdən sonra məlum olacaq (AZƏRTAC).