“Neftçi”də oynamaq uşaqlıqdan arzum olub”

“Oyun bizim üstünlüyümüz şəraitində keçdi. “Səbail”ə qarşı yaxşı çıxış etdik. Mövsümün sonu olsa da, çalışırıq ki, matçlara maksimum dərəcədə köklənək və meydana yaxşı motivasiya ilə çıxaq”.

Futbolxeber.az saytına açıqlamasında bu sözləri “Neftçi”nin futbolçusu Elcan Əbilov Azərbaycan Premyer Liqasının 35-ci turunda “Səbail”i 3:0 hesabı ilə məğlub etdikləri oyun barədə danışarkən deyib.

Gənc futbolçu gələcəkdə “Neftçi”nin əsas heyət üzvü olmağı arzuladığını bildirib: “Neftçi”də oynamaq uşaqlıqdan arzum olub. Futbola da elə burada başlamışam. Artıq 14 ildir “Neftçi” ailəsinin üzvüyəm. Şükür Allaha ki, bu mövsüm əsas komandada debüt etdim. Mənə şans verdiyinə, etibar etdiyinə görə Samir Abasova minnətdaram. Çalışacağam ki, növbəti illərdə daha çox oynamaq şansı qazanım və “Neftçi”nin əsas heyət üzvünə çevrilim”.

“Neftçi”nin “78 nömrəsi” növbəti turda “Sabah”a qarşı keçirəcəkləri oyundan da söz açıb: “Düzdür, “Sabah” bizi kubokdan kənarlaşdırdı. Lakin qarşıdakı görüşə revanş kimi baxmırıq. Rəqibdən asılı olmayaraq məqsədimiz hər matçda qalib gəlməkdir. Əlimizdən gələni edəcəyik ki, mövsümü qələbə ilə başa vuraq”.

TAĞI