Elvin Məmmədov: “Rəhbərliklə fikirlərimiz üst-üstə düşür ki, Premyer Liqaya geri qayıdaq”

"Ötən tur Premyer Liqada düşməyimiz rəsmiləşmişdi. Bu durumda oyunçuları matça kökləmək çətindir. Nə qədər danışdıq, amma futbolçu psixologiyasıdır. Bilirdik ki, "Neftçi"nin də 5-ci yerə şansı var və bizə qarşı aqressiv oynayacaqlar. Bir oyunumuz qalıb. Onu düşünürük".

Futbolxeber.az saytının məlumatına görə, bu sözləri "Səbail"in baş məşqçisi Elvin Məmmədov Azərbaycan Premyer Liqasının 35-ci turunda "Neftçi"yə 0:3 hesabı ilə oyundan sonra deyib.

O, “Artıq Birinci Liqaya fokuslanmısınız?” sualını belə cavablandırıb: “Bu barədə rəhbərliklə hələ dəqiq söhbət etməmişik. Ümid edirəm ki, yenidən "Səbail" iddialı olub, Birinci liqadan Premyer Liqaya yüksəlmək üçün hər şeyi edəcək. İndi danışmaq tezdir. Danışıq olmayıb. Rəhbərliklə fikirlərimiz üst-üstə düşür ki, Premyer Liqaya geri qayıdaq. Amma maliyyə məsələsi var. Çempionat bitdikdən sonra ətraflı danışacağıq. Xeyirdirsə, o yolda davam edəcəyik”.