“Araz-Naxçıvan”ın qapıçısı: “Biz məgər üçüncü yeri təmin etmək istəmirik?”

“Araz-Naxçıvan”ın qapıçısı Kristian Avramın Futbolxeber.az saytına müsahibəsi

- Azərbaycan Premyer Liqasının 34-cü turunda “Qarabağ”a 0:2 hesabı ilə uduzdunuz. Ağdam klubu ilə görüşdə xal qazanmağınıza nə mane oldu?

- Bəzən oyundan dərhal sonra matçı dəyərləndirmək çətin olur. Təbii ki, məğlubiyyət üzücüdür. Bəzi epizodlarda daha diqqətli olmaq lazımdır. İkinci hissədə öz oyunumuzu göstərməyə çalışdıq. Bir-iki qol epizodumuz da oldu. Dəyərləndirə bilmədik. 0:2-dən sonra da təslim olmadlıq. Lakin nəticəni dəyişmək mümkün olmadı. Səhvlərdən nəticə çıxarmağa və məqsədimizə çatmağa çalışmalıyıq.

- Baş məşqçi Elmar Baxşıyev oyunsonrası mətbuat konfrasında istisna etmədi ki, “Turan Tovuz”un “Neftçi”yə məğlubiyyətindən sonra komandada arxayınçılıq yaranıb...

- Mən baş məşqçimizin fikirlərini şərh edə bilmərəm. O, daha yaxşı bilir. Bəli, arxayınçılıq ola bilər. İstər-istəməz “Turan Tovuz”un məğlubiyyəti üzərimizdə təzyiqi azaldır. Lakin biz peşəkarıq, meydana çıxıb öz işimizi görməliyik.

- Razısınız ki, bu, cari mövsüm “Qarabağ”a qarşı ən zəif oyununuz idi?

- Ola bilər bu, sizin futbola baxışınızdır. Mənə görə komanda heç də pis oynamadı. Hücumlar qurmağa çalışırdıq. Bəlkə də əvvəlki oyunlardan fərqli olaraq bir qədər intensivlik çatışmırdı. İndiki məqamda əsas bərpa olmaq və səhvlərdən nəticə çıxarmaqdır. Çox yaxşı məqçilər korpusumuz var. Onlar hər zaman bizi düzgün yönləndirməyi bacarırlar.

- Nəhayət gələn tur “Şamaxı” ilə matçda “Araz-Naxçıvan” bürünc medalı təmin edə biləcək?

- Biz məgər üçüncü yeri təmin etmək istəmirik? Bunu “Qarabağ”la oyunda da reallaşdırmaq istəyirdik. Yaxud “Şamaxı” məgər zəif rəqibdir?

- Mən demirəm istəmirsiniz, ya da “Şamaxı” zəifdir. Sadəcə rəqibin turnir cədvəli baxımından heç bir iddiası yoxdur,  siz isə bürünc medal qazanmağa çalışırsınız. Hər halda da “Şamaxı” ilə matçda da xal almayandan sonra necə avrokuboklara iddia edə bilərsiniz?

- Anlayıram. Əslində biz daha əvvəldən bürünc medalı təmin etməliydik. Lakin futbol riyaziyyat deyil ki, deyək 1+1 ikiyə bərabərdir. Canlı insanlarıq, emosiyalar var. Bura nə istəsəniz, əlavə edə bilərsiniz. Deyə bilmərik “Şamaxı” ilə matçda xal artıq cibimizdədir. Yaxud meydana çıxanda bizi asan gəzinti gözləyir. Xeyr. Hər bir halda səfərə qələbə üçün yollanacağıq.

- Mövsümün sonunda müqaviləniz bitir. Sizi yeni mövsümdə də “Araz-Naxçıvan”da görə biləcəyik?

- Açıq danışacağam. Bəli, müqaviləm bitir. Amma bu barədə klub rəhbərliyindən soruşsanız, daha yaxşı olar. Hər şey mümkündür.

- Belə çıxır ki, hələ yeni sözləşmə barədə təklif almamısınız?

- Bu barədə ən dəqiqini rəhbərlik bilir. Bəlkə də yeni müqavilə imzalamışam, bəlkə də yox.

- Axı dediniz açıq danışacağam...

- Açıq dedim ki, rəhbərlikdən bu barədə soruşun. Onlar sizə daha dəqiq cavab verərlər.

- Yəqin ki, yeni müqavilə imzalamamısınız. Çünki imzalasaydınız, klub açıqlayardı. Necə ki, bir neçə gün əvvəl İqor Ribeyro ilə sözləşmənin uzadılması barədə klubun mətbuat xidməti xəbər yaydı...

- İqorla danışıqlar bir qədər intensiv oldu. Bəlkə də klub lazımi anı gözləyir.

- Onda yəqin bürünc medalın təmin olunmasını gözləyirlər...

- Bir söz deyə bilmərəm (gülür).

İbrahim Cəfərov