Vitali Borisov: “Əksər oyunçular ağrıkəsici hesabına meydana çıxmışdı”

Azərbaycan millisinin baş məşqçisi Vitali Borisov futzal üzrə Avro-2026-nın əsas mərhələsində Xorvatiyaya 1:4 hesabı ilə uduzduqları oyunu şərh edib.

Futbolxeber.az saytının məlumatına görə, o, matçla bağlı təəssüratlarını bölüşüb: “Güclü rəqibə qarşı oynadıq. Xorvatiya millisi qrupda keçirdiyi 6 oyunun hamısında qələbə qazandı və maksimum xalla Avropa çempionatının final mərhələsinə yollandı. Komandamız bu gün yaxşı çıxış etdi. Adətən ikinci hissədə çatdırmırdıq və oyundan qopurduq. Bu dəfə güclü rəqibə qarşı yaxşı mübarizə apardılar. Heyətimizdə zədəli futzalçı çoxdur. Əksəriyyəti ağrıkəsici hesabına meydana çıxmışdı. Ancaq bunu hiss etdirmədilər”.

Mütəxəssis yığmamızın heyətindən kənarlaşdırılan qapıçı Rövşən Hüseynli haqda da söz açıb: “Rövşən Hüseynli ilə bağlı nə lazımdırsa danışmışıq, məlumat vermişik. Onu bu toplanışdan kənarlaşdırmışıq, amma millinin qapıları növbəti toplanışlarda onun üzünə açıqdır. Bu, hamımızın millisidir. Bu gün buraxdığımız qolların heç birində qapıçının səhvi olmadı”.