Elmar Baxşıyev: “Uda da bilərdik, uduza da”

“Ağır oyun alındı. Belə olacağını təxmin edirdik. Sıx qrafikdəyik. İkinci hissədə oyunun tepmini qaldırdıq, epizodlar yaratdıq. Uda da bilərdik, uduza da. Gələn oyuna hazırlaşacağıq”.

Futbolxeber.az saytının məlumatına görə, bu sözləri “Araz-Naxçıvan”ın baş məşqçisi Elmar Baxşıyev Azərbaycan Premyer Liqasının XXX turunda “Kəpəz”ə qarşı keçirilən oyundan (0:0) sonra deyib.

Daha sonra mütəxəssis jurnalistlərin suallarını cavablandırıb:

- Müdafiədə boşluqlar çox idi. Bunun səbəbi nədir?

- Sırf müdafiəçilərlə bağlı deyil. Heyətimizdə çoxlu zədəli futbolçu var. Buna görə rotasiyalara getməyə məcburuq. İlk yarıda oyunumuz alınmadı. İkinci hissədə daha yaxşı oynadıq.

- Qarşıda "Turan Tovuz" və "Qarabağ"la oyunlar var. Komandada gərginlik var?

- Futbol stresli idman növüdür. Gərginliyin olmağı normaldır. Bizi nəyin gözlədiyini bilirik. Gərək iddiasız olsan ki, belə qrafikə girməyəsən. Komanda hər iki cəbhədə öz iddiasını göstərəcək.

- Turnir cədvəlində üçüncü yeri itirmək təhlükəsini hiss etmirsiniz?

- Bizi düşündürən "Turan Tovuz" deyil, özümüzük. Başqa komandanın nəticəsinə görə xoşbəxtlik axtarmaq istəmirik. Hər şey özümüzdən asılıdır.

- "Kəpəz" ən çox qol buraxan komandadır. Onlara qol vura bilməməyinizin səbəbi nədir?

- Mən o fikirdə deyiləm. "Kəpəz" qış fasiləsindən sonra iddialı komandalardan xal alıb. Çempionatımızda zəif komanda anlayışı yoxdur.