Vüqar Nadirov: “24 ildir hər namazda dua edirdim ki, atamın məzarını tapım”

“32 ildən sonra atamın məzarını tapdıq. Bu, mənim üçün çox çətin, ağır idi. Sanki üzərimdən bir yük götürüldü”.

Futbolxeber.az saytına açıqlamasında bu sözləri millimizin  sabiq üzvü, hazırda “Şəmkir”in baş məşqçisi olan Vüqar Nadirov Birinci Qarabağ müharibəsi şəhidi, atası Ərşad Nadirovun məzarını tapması haqda danışarkən deyib.

O, məzarın tapılmasını belə təsvir edib: “Bacılarımla birgə Ağdama yollandıq. Bu işdə iki nəfərin bizə köməyi dəydi. Biri qohumumuz var, Nəriman kişi. Hansı ki, onun atası məzarın yerini bilirdi. Bir də bizim kimi Seyidlidən olan Xaqani müəllim. O, 1993-cü ildə atam dəfn olunarkən orada olub. Xaqani müəllim beynində hər şeyi canlandırdı, necə gəldiklərini, harada basdırdıqlarını təsəvvür edirdi. Dediyinə görə, həmin vaxt atışma gedirmiş, bu səbəbdən də atamı tələsik dəfn ediblər”.

V.Nadirov qeyd edib ki, uzun illər atasının məzarını tapmaq arzusu ilə yaşayıb: “32 il az müddət deyil. Mən uzun illərdi bu arzuyla yaşayırdım. 24 ildir hər namazda dua edirdim ki, atamın məzarını tapım. Allaha min şükür ki, tapdım. Təbii ki, gələcəkdə test olacaq. Allah bütün şəhidlərimizə rəhmət eləsin, qazilərimizə, əsgərlərimizə cansağlığı versin. Biz bu günlərə onların sayəsində çatmışıq. Sanki üstümdən böyük bir yük götürüldü”.

Xatırladaq ki, Ermənistanın işğalı zamanı onminlərlə azərbaycanlının qəbri kimi, Vüqar Nadirovun atası Ərşad Nadirovun da qəbri dağılıb və Ağdam azad olunduqdan təxminən 4 il yarım sonra çətinliklə aşkarlanıb.

Ərşad Nadirov Birinci Qarabağ müharibəsinin qəhrəman döyüşçülərindən idi. “General Ərşad” ləqəbli Nadirov 1993-cü ilin iyulun 22-də, 43 yaşında şəhid olub və Ağdam rayonunda dəfn edilib.

Fərəc Aslanov