II Liqanın iki klubu I Liqada oynamaq hüququ qazanıb

II Liqanın iki klubu 2025/26 mövsümündə I Liqada oynamaq hüququ qazanıb.

Futbolxeber.az saytının məlumatına görə, bunlar “Şahdağ Qusar” və “Şəfa”dır. Hər iki komandanın 20-ci turdan sonra yarışı ilk üçlükdə başa vuracağı dəqiqləşib.

Sona 6 tur qalmış “Şahdağ Qusar” 58 xalla 1-ci, “Şəfa” 55 xalla 2-ci yeri tutur. Hazırda 4-cü pillədə qərarlaşan “Haypers Quba” “Şahdağ Qusar”dan 22, “Şəfa”dan isə 19 xal geri qalır. Bu o deməkdir ki, sonuncu iki komanda qarşıdakı 6 turun nəticəsindən asılı olmayaraq ilk üçlüyü tərk etməyəcək.

AFFA İcraiyyə Komitəsinin 19 fevral 2025-ci il tarixli qərarına əsasən, 2024/2025-ci illər mövsümündə I Liqada sonuncu yeri tutmuş klub II Liqaya düşəcək, II Liqadan isə ilk 3 yeri tutmuş komanda birbaşa I Liqaya yüksələcək.

I Liqada 9-cu yeri və II Liqada 4-cü yeri tutan komandalar arasında neytral meydanda bir oyundan ibarət pley-off matçı keçiriləcək. Qalib komanda I Liqada mübarizə aparmaq hüququ qazanacaq.

Qeyd edək ki, hazırda II Liqada 3-cü yeri 20 oyundan 43 xal toplamış “Şimal”, 4-cü yeri isə 36 xalla “Haypers Quba” tutur.