Felipe Santos: “Qarabağ”la oyun mənim üçün xüsusi əhəmiyyət daşıyırdı”

“Araz-Naxçıvan”ın yarımmüdafiəçisi Felipe Santosun Futbolxeber.az saytına müsahibəsi

- Azərbaycan kubokunda yarımfinalın ilk oyununda “Qarabağ”ı məğlub etdiniz. 1:0 hesablı qələbəni necə şərh edərdiniz?

- Çətin matç oldu. Azərbaycanın ən yaxşı klubuna qarşı oynayırdıq. “Qarabağ”a qarşı hər qarşılaşmamız döyüş xarakterlidir. Minimal hesabla qalib gəldik. Finala çıxmaq üçün bütün gücümüzü ortaya qoyacağıq.

- Bu mövsüm çempionatda “Qarabağ”a qalib gələ bilməsəniz də, kubokda onları məğlub etdiniz. Dəyişən nə idi, motivasiya fərqli idi?

- Çempionatdakı matçlarda uduzsaq da, rəqiblə başa-baş oynamışdıq. Müəyyən səhvlərimiz “Qarabağ”ın qollar vurmasına gətirib çıxarmışdı. Kubok görüşündə isə çox yaxşı, diqqətli oynadıq və qapımızı toxunulmaz saxlaya bildik. Bəlkə də 3, yaxud 4 qolla da qalib gələ bilərdik.

- Cavab oyunu öncəsi şansları necə dəyərləndirirsiniz?

- Şanslar hələ də 50-nin 50-yədir. Düzdür, ilk oyunda qalib gəlmişik. Lakin “Qarabağ”ın gücünü nəzərə alsaq, cavab oyununun çətin keçəcəyi gözləniləndir.

- “Qarabağ”la çempionatdakı son oyunda yaşanan xoşagəlməz halları nəzərə alsaq, kubok görüşünün sizin üçün xüsusi əhəmiyyət kəsb etdiyini söyləyə bilərik?

- Bəli, bu oyun mənim üçün xüsusi əhəmiyyət daşıyırdı. Son görüşdən sonra mənim haqqımda çox adam çox şey danışırdı. Mənim futbolçu keyfiyyətim bu problemə təsir etmir. Mən kim olduğumu bilirəm. Hər zaman oyunumla, vurduğum qollarla “Araz-Naxçıvan”a daha çox fayda vermək istəyirəm.

- Cəza səbəbindən “Araz-Naxçıvan”ın çempionatdakı son iki oyununda meydana çıxa bilmədiniz. Komanda kənardan necə görünürdü?

- Kənarda qalmaq mənim üçün çətin idi. Çünki komandama kömək edə bilmirdim. Təvazökarlıqdan uzaq olsa da, “Araz-Naxçıvan”ın içində bir liderəm. Mən olmayanda çətindir. Qarşıda çoxlu oyunlarımız var. Düşünürəm ki, yenə komandama kömək edəcəyəm.

- “Sumqayıt”la oyunda çempionata qayıdışınızı qolla qeyd edə biləcəksiniz?

- Mən komandama hər zaman kömək etmək istəyirəm. Vacib olan həmin matçda qələbə qazanmaqdır. Çünki 3 xala çox ehtiyacımız var.

Fərəc Aslanov