Almeyda: “Məşqçimiz Qurban Qurbanov xasiyyətdə adamdır”

"Özümü burada çox yaxşı hiss edirəm və xoşbəxtəm”.

Futbolxeber.az saytının məlumatına görə, bunu “Qarabağ”ın və Azərbaycan yığmasının sabiq üzvü Riçard Almeyda deyib.

Braziliya A2 liqasında mübarizə aparan “Primavera” klubunda çıxış edən 36 yaşlı təcrübəli yarımmüdafiəçi oradakı karyerasından danışıb: “Klub rəhbərliyinə və baş məşqçisinə təşəkkür edirəm ki, mənə inanırlar və şərait yaradırlar. Komandanın baş məşqçisi Qurban Qurbanov xasiyyətdə adamdır. Xarakterləri eynidir. Onlara təşəkkür edirəm ki, mənə yenidən qucaq açdılar. Bildiyiniz kimi, mən Braziliyadan uşaq yaşlarımda ayrılmışam. Yenidən qayıdıb burada öz ölkəmin futbolunu hiss etmək yaxşı gəldi. Mənə meydana çıxıb tez-tez oynamaq imkanı yaratdılar. Düzdür, bütün oyunlara əsas heyətdə çıxmıram, amma oynayıram. Çünki komandanın oturuşmuş heyəti var idi və mən çempionatın sonuna yaxın gəldim. Burada hər şey yaxşıdır, qələbələr qazanırıq. Yarımfinala vəsiqə əldə etmişik. Əgər mərhələ adlasaq, Paulista çempionatının Birinci divizionuna çıxacağıq. Şənbə günü oyunumuz var. Bir də yaş sadəcə rəqəmdir. Əgər düzgün qidalanırsansa, diqqət edirsənsə, orqanizm də sənin sözünə qulaq asır. Ümumilikdə hər şey yaxşıdır və ürəyimcədir”.

Almeyda Azərbaycan yığmasının yoldaşlıq görüşlərində Haitiyə (0:3) və Belarusa (0:2) məğlubiyyətlərindən danışıb: “Təəssüf ki, oyunları tam izləyə bilmədim. Matçların geniş icmallarına baxdım. Çox məyusedicidir və təəssüflənirəm. Düşünürəm ki, federasiyada işləyənlər, bu işə cavabdeh olan hər kəs səhvlərini görməlidir. Gözlərini daha geniş açmalıdırlar. Sadəcə, düzgün yolu tutmaq və səbr etmək lazımdır”.

Xatırladaq ki, 36 yaşlı yarımmüdafiəçi yarımfinalda “Tabuate”ni 2:0 hesabı ilə məğlub etdikləri matçda hesabı açmışdı (futbolinfo.az).