AFFA 5 klubu cərimələdi

Bu gün AFFA İntizam Komitəsinin iclası keçirilib.

Futbolxeber.az saytının məlumatına görə, iclasda II Liqanın 18-ci turundakı qayda pozuntuları ilə bağlı qərarlar qəbul edilib.

“Ağdaş” - “Şəki Siti” oyununda “Ağdaş”ın 5 futbolçusu sarı vərəqə aldığı üçün klub 70 manat cərimələnib.

Matçın 90+3-cü dəqiqəsində meydan sahiblərinin 20 nömrəli futbolçusu Ülvi Sarıyev ikinci sarıdan qırmızı vərəqə aldığı üçün 1 oyun cəzalandırılıb, “Ağdaş” 50 manat cərimə edilib.

Görüş bitdikdən sonra “Ağdaş”ın azarkeşləri tərəfindən meydançaya kənar əşyalar atıldığına görə klub 80 manat cərimə edilib.

“Şəfa” - “Şəmkir” oyununda qonaqlardan 4 nəfər sarı vərəqə aldığı üçün klub 70 manat cərimələnib.

Oyun bitdikdən sonra meydançaya kənar şəxslər daxil olduğuna görə meydan sahibləri 80 manat cərimə edilib.

“Kür-Araz” - “Füzuli” matçında “Kür-Araz” matçın ilkin protokolunu elektron sistemdə gec təsdiq etdiyinə görə 100 manat cərimələnib.

Qarşılaşmada futbolçusu sarı vərəqə aldığı üçün "Kür-Araz" 70 manat cərimə edilib.

Görüşdə “Füzuli”nin 4 futbolçusunun sarı vərəqə alması səbəbindən klub 70 manat cərimələnib.

“Füzuli” komandasının adı matçın protokolunda olmayan rəsmi şəxsi Vasif İsmayılov texniki zonada olduğu üçün klub 80 manat cərimələnib.