Santuşun minnəti - QEYD

Aylardır idman mətbuatından uzaq gəzən milli komandamızın baş məşqçisi Fernandu Santuş nəhayət ki, uzun fasilədən sonra Azərbaycan Premyer Liqasında legioner limitinin ləğvinə münasibət bildirdi. Kaş bildirməz olaydı. Çünki onun dediklərini hansısa azərbaycanlı məşqçi desəydi, bu dəqiqə mətbuat basıb gözünü çıxarırdı ki, “utanmaz, yaltaq, özünü AFFA-ya göstərir, yerini şirin edir və s.”

“Təkcə legioner limiti ləğv olunmayıb, həm də komanda sayı artırılıb. Bunun nə qədər faydalı olacağını görmək üçün zaman lazımdır”.

Ay Santuş müəllim, heç dediklərinizdən xəcalət təri axıdırsınız? Millimizin baş məşqçisi kimi boş-boşuna hər ay aldığınız paçka-paçka pullar boğazınızdan necə keçir? Bu nə açıqlamadır? Necə yəni zaman lazımdır? Məlum məsələdir ki, hər bir addımın nə qədər faydalı olub-olmayacağını bilmək üçün vaxta ehtiyac var. Bunu demək üçün Portuqaliyadan basa-basa Azərbaycana gəlməyə ehtiyac yox idi. Bunu qonşumuz Əlövsət dayı da deyir...

Mister Santuş, siz bir daha sübut etdiniz ki, Azərbaycanda sizi düşündürən yalnız puldur. Çünki bu cür cavabı ancaq “salla başını, al maaşını” prinsipi ilə işləyən adam verə bilər...

Portuqaliyalı mütəxəssis hər ay ona layiq olmadığı pullar verən AFFA rəhbərliyinə yarınmağı da unutmur. “Təkcə legioner limiti ləğv olunmayıb. Komanda sayı da artırılıb” - bu, mədəni şəkildə Azərbaycan futbolunda təkcə pis yox, yaxşı şeylər də olub deməkdir...

Fernandu Santuşun bura qədər qabartdığımız fikirləri AFFA rəhbərliyinə xoş görünmək üçün dediklələri idi. “Haiti millisi FİFA reytinqində bizdən 30 pillə irəlidədir. Çox yaxşı, keyfiyyətli komandadır, zəif rəqib deyil. Qələbə qazanmaq üçün rəqib seçsəydik, daha zəif kollektivlə üz-üzə gələrdik” - bu açıqlamada isə həm şişirtmə var, həm də minnət!

Əvvəla, ondan başlayaq ki, təkcə Santuş yox, AFFA-ya yaltaqlanan bəzi “mütəxəssislər” də Haiti millisini dağ başına qaldırıblar. Pah, dünya reytinqində 86-cı imiş. Olsun da. Nə böyük nəticədir? Ay Haitini güclü rəqib kimi təqdim azərbaycanlı məşqçilər, bu komanda sonuncu dəfə nə vaxt yoxlama oyununda Avropa təmsilçisi ilə üz-üzə gəlib, bilirsiniz? Bilmirsinizsə, deyim – 2014-cü ilin martında. Həmin vaxt Haiti yığması Kosovo ilə qarşılaşıb. Bu fakt onu göstərir ki, Avropa ölkələri yoxlama matçında Haiti kimi rəqiblə üz-üzə gəlməkdə maraqlı deyillər. Elə olmasaydı, yəqin ki son 11 ildə hansısa Avropa yığması Haitini özünə rəqib seçərdi. Haiti millisinin son 2 ildə üz-üzə gəldiyi rəqiblərin adlarına baxın – Aruba, Sint-Marten, Puerto-Riko, Barbados, Sent-Lyusiya, Fransız Qvianası, Yamayka, Surinam, Kuba... Bilinmir, futbol yığmalarıdır, yoxsa coğrafiya dərsindəyik...

“Azarkeşlərimizə qalibiyyət bəxş etmək istəyirik. Amma indi rəqib seçəndə bunu düşünmürük. Biz indi gələcəyin milli komandasını formalaşdırırıq”. – Cənab Santuş, siz gələcəyin komandasını formalaşdırırsınızsa, niyə son zamanlar adından söz etdirən “Səbail”in qapıçılarından birini yığmaya dəvət etmədiniz? Şahruddin Məhəmmədəliyevin onsuz da potensialına bələdsiniz... Bu cür misallar N qədər çəkmək olar. Amma və lakin vaxt itkisidir. Onsuz da AFFA rəhbərliyi də, Fernandu Santuş da öz işlərindədirlər – necə deyərlər, salla başını, al maaşını...

İBRAHİM