“Neftçi”nin yarımmüdafiəçisi dəvət gözləyir: “Milli komanda hamının olmaq istədiyi yerdir"

“Neftçi”nin yarımmüdafiəçisi Elvin Camalov qarşıdakı təlim-məşq toplanışı üçün milli komandadan dəvət gözləyir.

Bu barədə o, Futbolxeber.az saytına müsahibəsində deyib.

“Əlbəttə, milli komandadan dəvət gözləyirəm. Milli hamının olmaq istədiyi yerdir. Mən də istərdim ki, dəvət alım və milli komandamız üçün əlimdən gələni edim”, - deyə “Neftçi”nin yarımmüdafiəçisi vurğulayıb.

Camalov milli komandamızın mart toplanışı zamanı yoldaşlıq görüşlərimdə qarşılaşacağı rəqiblərinin birmənalı qarşılanmamasına da münasibət bildirib: “Yoldaşlıq görüşü təşkil olunursa, rəqibin o qədər də əhəmiyyəti yoxdur. Bizim üçün qarşıdakı təlim-məşq toplanışı vacibdir. Yığmada özünü göstərmək hər bir futbolçunun borcudur. İnanıram ki, millimiz tezliklə ən yaxşı yerlərdə olacaq. Qarşıdakı toplanış da bu baxımdan millimizə fayda verəcək”.