Ağadadaş Salyanski: “Məqsədimiz kuboku qazanmaqdır”

“Neftçi”nin hücumçusu Ağadadaş Salyanskinin Futbolxeber.az saytına müsahibəsi

- Ölkə kubokunun 1/4 final mərhələsinin cavab oyununda “Kəpəz”i 1:0 hesabı ilə məğlub edərək yarımfinala yüksəldiniz. Görüşlə bağlı nə deyə bilərsiniz?

- İlk matçda səfərdə 2:0 hesablı qələbə qazanmışdıq. Buna görə də üstünlüyümüz var idi. Lakin meydana çıxarkən bu barədə düşünmürdük. Məqsədimiz yalnız və yalnız qələbə idi. Oyun qarlı həva şəraitində keçdi. Lakin buna çox da fikir vermədik. Çətin hava şəraitinə baxmayaraq, bütün gücümüzlə mübarizə apardıq. Bilirdik ki, arxayınlaşmaq olmaz. Yekunda da lazımi nəticəni qazandıq və mərhələ adladıq.

- Hazırda “Neftçi”nin avrokuboklara yollanmaq üçün əsas ümumi kubokadır. Bu məqam çempionat oyunlarına köklənməyə mane olmur?

- Bəli, məqsədimiz kuboku qazanmaqdır. Təəssüf ki, çempionatda liderlər qrupundan aralı düşmüşük. Açıq danışsaq, ilk üçlüyə düşmək hazırda çox çətin görünür. Bununla belə, hər matça qələbə üçün çıxırıq. Fərqi yoxdur, bu, çemppionat oyunudur, yoxsa kubok. Kubokda isə şansımız daha realdır. Yekunda da kuboku qazanmaq üçün əlimizdən gələni edəcəyik.

- Yarımfinalda “Sabah”la qarşılaşacaqsınız. Şansları necə dəyərləndirirsiniz?

- Hər şey özümüzdən asılıdır. Məqsədimiz kuboku qazanmaqdır və buna görə də finala gedən yolda “Sabah”ı mübarizədən kənarlaşdırmalıyıq.

- Qarşıdakı həftə yenidən “Kəpəz”lə üz-üzə gələcəksiniz. Lakin bu dəfə ölkə çempionatında. Eyni rəqiblə ardıcıl qarşılaşmaq yorucu deyil?

- Təqvim belədir. Bu, bizdən asılı olan məsələ deyil. Bu dəfə “Kəpəz”lə Tovuzda üz-üzə gələcəyik. Məqsədimiz səfərdən 3 xalla qayıtmaqdır.

- Son zamanlar sizi tez-tez “Neftçi”nin ilk 11-liyində görürük. Artıq əsas heyət üzvü kimi meydana çıxmağa öyrəşmisiniz?

- Mən artıq bir neçə ildir əsas heyətdə yer alıram. Lakin bu mövsümdən daha çox oynamaq şansı qazanıram. Bəli, əsas heyətdə yer almağa artıq öyrəşmişəm. Baş məşqçi mənə şans verirsə, etimadı doğrultmaq üçün əlimdən gələni etməliyəm.

- “Neftçi”də əsas heyət üzvünə çevrildiyinizi nəzərə alsaq, millinin qarşıdakı toplanışı üçün dəvət gözləyirsiniz?

- Bu barədə qərarı milli komandanın baş məşqçisi Fernandu Santuş qəbul edəcək. Mən istənilən halda onun qərarına hörmətlə yanaşıram. Həm də hazırda U-21-in üzvüyəm. Əsas milliyə dəvət alsam, buna yalnız sevinərəm. Ancaq dediyim kimi, bu barədə qərarı baş məşqçi qəbul edir.

Tağı Məmmədov