Qurban Qurbanov: “Sizə də soyuq oldu?”

“Futbolçularımı təbrik edirəm. Yarımfinala vəsiqə qazandılar. Havanın soyuq olmasına baxmayaraq, oyunda ciddi idilər. Rəqib də heyətdə bəzi dəyişikliklər etmişdi. Bizim üçün xeyli problem yaşatdılar. Azarkeşlər üçün heç də maraqsız oyun olmadı. Qollar vuruldu, bəzi qollar sayılmadı. Qarşıdakı oyunlara hazırlaşacağıq”.

Futbolxeber.az saytının məlumatına görə, bu sözləri “Qarabağ”ın baş məşqçisi Qurban Qurbanov Azərbaycan Kubokunun 1/4 final mərhələsinin cavab oyunu çərçivəsində “Səbail”i 3:1 hesabı ilə məğlub etdikləri görüşdən sonra deyib.

Daha sonra mütəxəssis jurnalistlərin suallarını cavablandırıb:

- Üçüncü qolda VAR-ın gec qərar verməsi haqda fikriniz necədir?

- Yəqin elə epizod idi ki, çox incələmək lazım gəldi. Sizə də soyuq oldu? Mənə də soyuq oldu (gülür). Epizoda baxdım.

- Avrokuboklar və yerli çempionatda topun oyunda qalma müddəti arasında böyük fərq olduğunu demişdiniz. İndi necədir vəziyyət?

- Yenə də aşağıdır. Avrokubok və yerli matçları müqayisə etsək, topun meydanda qalma müddəti arasında 8-10 dəqiqəlik fərq var.