Aydın Bayramov: “Zirədəki sonluq bizim motivasiyamızı daha da artırdı”

“Zirə”nin qapıçısı Aydın Bayramovun Futbolxeber.az saytına müsahibəsi

- Azərbaycan Premyer Liqasının 23-cü turunda səfərdə “Sumqayıt”ı məğlub etdiniz. 3:0 hesablı qələbəni necə şərh edərdiniz?

- Asan qələbə qazandığımızı deməzdim. Hesaba baxmayaraq, ağır oyun keçdi. Xüsusən də ilk hissə. Şükürlər olsun ki, yaxaladığımız şanslardan istifadə edə bildik. Layiqli qələbə qazandıq.

- Cari mövsüm hər 3 oyunda “Sumqayıt”a qalib gəlmisiniz...

- Düzdür, cari mövsüm hər 3 matçda qələbə qazanmışıq. Lakin bu oyunların heç biri asan keçməyib. “Sumqayıt” heç də zəif rəqib deyil.

- Öncəki turda dramatik oyunda “Neftçi”yə məğlub olmuşdunuz. O cür sonluq komandada psixoloji baxımdan gərginlik yaratmamışdı?

- Deməzdim. Düzdür, ağır oldu. Özümüz də gözləmirdik bunu. Çünki hesab 1:1 olarkən artıq oyunun bitdiyini düşünmüşdük. Lakin bu məqam bizim motivasiyamızı daha da artırdı.

- Növbəti turda “Kəpəz”lə qarşılaşacaqsınız. Həmin matçdan gözləntiləriniz nədir?

- Vaxtımız var. Düşünürəm ki, bir həftə ərzində “Kəpəz”lə oyuna düzgün, yaxşı hazırlaşacağıq. Məqsədimiz qələbə qazanmaqdır. Amma bu, heç də asan deyil. Çünki liqada qalmaq uğrunda gərgin mübarizə gedir. Hansısa oyunun nəticəsini əvvəldən proqnozlaşdırmaq mümkün olmur.

- Daha sonra kubok matçı gəlir. “Araz-Naxçıvan”la cavab görüşündə ilk oyundakı məğlubiyyətin əvəzini çıxmaq mümkün olacaq?

- Birinci oyunda səfərdə uduzmuşuq. Çalışacağıq ki, həmin yenilginin əvəzini çıxaq, vəziyyəti düzəldək. Bu heç də asan olmayacaq, bilirik, lakin sona qədər mübarizə aparacağıq.

- “Zirə” üçün prioritet çempionatdır, yoxsa kubok?

- Hər ikisi. Həm kubokda, həm də çempionatda sona qədər mübarizə aparacağıq. İkisində də yolumuza davam etmək istəyirik.

- Son günlərin əsas müzakirə mövzusu Premyer Liqada legioner Iimitinin ləğvidir. Siz bu barədə hansı fikirdəsiniz?

- Bu barədə heç nə deyə bilmərəm. rəhbər şəxslər fikir bildirsə, daha yaxşı olar. Sadəcə onu demək istəyirəm ki, buna qədər də legionerlərlə aramızda rəqabət var idi, bundan sonra daha artıq olacaq. Komanda sayı 12 oldu ki, bu, superdir. İstərdim iştirakçı sayı daha da çox olsun.

Fərəc Aslanov