Feysbukda yox, stadionda söz demək zamanı

“Neftçi” yenə uduzdu”, “Əşi, dedim də Samir Abasovun qayıdışının xeyri yoxdur”, “Bir düz-əməlli hücumçu tapa bilmirlər”, “Bu nə oyundu” və s. Bu tip şərhlərə “Neftçi”nin hər uğursuz oyunundan sonra klubun feysbuk səhifəsindəki paylaşımların altında rast gəlirik. Son zamanlar “Neftçi”də ən çox əziyyət çəkənlər bəlkə də klubun SMM işlərinə məsul şəxslərdir...

Azarkeşi başa düşmək olur. Fanatdır və sevimli klubunun məğlubiyyətini qəbul edə bilmir. Amma vəziyyət yaxşıya doğru dəyişirsə, yanaşma da dəyişməlidir. Uduzanda tənqid etdiyin futbolçunu, udanda alqışlamalı, arxasında durmalısan. Eynən indi olduğu kimi.

Hazırda “Neftçi” azarkeşi sevimli klubuna dəstək verməlidir. 3 qələbə ciddi faktor olmaya bilər, amma ən azından irəlidə işıq görünür. “Neftçi” o işığa doğru tək yox, azarkeşləri ilə birgə addımlamalıdır.

Fevralın 16-da “Neftçi” öz meydanında “Qarabağ”ı qəbul edəcək. “Kəpəz”in zəifləməsindən, “Xəzər Lənkəran”ın dağılmasından sonra Ağdam klubu flaqmanın ən ciddi və əzəli rəqibidir. Turnir cədvəlində komandaların neçənci yerdə qərarlaşmasından asılı olmayaraq “Neftçi” - “Qarabağ” qarşıdurması prinsipialdır. Prinsipial rəqib üzərində də qələbədən gözəl nə ola bilər? Odur ki, bazar günü “Neftçi” dəstəksiz qalmamalıdır.

Hazırda komandalar arasında xal fərqinin çox olması, “Neftçi”nin çempionluq uğrunda mübarizə aparmaması və s. Bütün bunları boş verin. İndi feysbukda yox, stadionda söz demək zamanıdır.

Hörmətli azarkeş, fevralın 16-da “Neftçi”nin sənin dəstəyinə ehtiyacı var. Komanda ardıcıl 3 oyunda qələbə qazanıbsa, sən də bunun qarşılığını stadiondan dəstəyinlə ver. Hər şey bir qırağa, təkcə elə Zirədəki son dramatik qələbəyə görə bazar günü “Neftçi”ni tək qoymamağa dəyər. Demirsiniz “Neftçi” azarkeşi heç kimə bənzəmir? Bazar günü bunu bir daha əzəli rəqibə də, onun azarkeşinə də göstərmək şansıdır. “Bu şəhər bizimdir, “Neftçi”lilərin” - bunu təkcə dildə yox, əməldə də göstərmək zamanıdır.

“Neftçi Arena”nın tutumu nə qədərdir? Qoy olsun 11 min. Yəni “bu şəhərdə stadionu dolduracaq 11 min “Neftçi” azarkeşi yoxdur?” sualını kimə ünvanlasaq, “niyə yoxdur, nəinki 11 min, lap 111 min də var” cavabını eşidəcəyik. Odur ki, göstərin bunu. “Neftçi”nin fevralın 16-da sizin dəstəyinizə ehtiyacı var.