“Səbail”in legioneri hakimi “bombaladı”: “Başa düşürəm, “Qarabağ”a kömək etmək lazımdır, lakin...”

“Səbail”in müdafiəçisi Dmitro Litvinin Futbolxeber.az saytına müsahibəsi

- Azərbaycan kubokunun 1/4 final mərhələsinin ilk oyununda “Qarabağ”a uduzdunuz. 0:1 hesablı məğlubiyyəti necə şərh edərdiniz?

- Keçirdiyimiz bu oyuna görə komandamızla fəxr edirəm. “Qarabağ”la matça çox yaxşı köklənmişdik. Kompakt oynamağa, baş məşqçinin tapşırıqlarını yerinə yetirməyə çalışırdıq. “Qarabağ”ın futbolçularının səviyyəsi, ustalığı hər kəsə məlumdur. Yaxaladıqları fürsətdən istifadə etdilər və ilk hissədə hesabda önə keçdilər. Rəqib bundan sonra da hücumlarını davam etdirirdi. Fasilədən sonra bizim də şanslarımız oldu. Təəssüf ki, bir neçə real qol epizodunu boşa verdik.

- Əvvəlcə vurduğunuz qol, daha sonra rəqib qapısına təyin edilən penalti ləğv olundu...

- Qoy Hakimlər Komitəsi bu məsələyə diqqət yetirsin. Mən hesab edirəm ki, hakimin bizə münasibəti ədalətli deyildi. Başa düşürəm, “Qarabağ” ardıcıl uğursuz oyunlar keçirib, onlara kömək etmək lazımdır, bütün bunlar yaxşıdır, amma bizə də hörmətlə yanaşmalıdırlar. “Səbail”in heç kimə pisliyi dəyməyib.

- Real yanaşsaq, demək olar ki, bu məğlubiyyətdən sonra “Səbail”in mərhələ adlamaq şansı cüzidir?

- Cəmi 1 top fərqi ilə uduzmuşuq. Qarşıda cavab oyunu var. Məncə, cütün taleyi ikinci matçda həll olunacaq. Lakin real danışsaq, bizim üçün prioritet çempionatdır.

- Matç göstərdi ki, “Qarabağ” hazırda əvvəlki kimi əzəmətli deyil. Bu məqam həftəsonu Ağdam klubuna qarşı keçirəcəyiniz oyundan öncə komandanız üçün əlavə motivasiya olacaq?

- “Qarabağ” hər zaman təhlükəlidir. Elə oyunçuları var ki, istənilən an təkbaşına oyunun taleyini həll edə bilərlər. Onlarla matça maksimum konsentrasiya ilə çıxmalısan, heç cür boşalmaq olmaz. Qarşıdakı görüşə çox ciddi hazırlaşacağıq.

- Azərbaycan çempionatında komanda sayı artırılsa da, format qeyri-müəyyəndir. Neçə komanda aşağı liqaya düşəcək, yaxud ümumiyyətlə düşməyəcək - bütün bu suallar açıq qalıb. Bu məqam Premyer Liqada qalmaq uğrunda mübarizə aparan “Səbail”ə psixoloji təsir göstərə bilər?

- Bizə heç nə psixoloji təsir göstərmir. Qarşımızda duran tapşırıq var. Onu yerinə yetirməliyik. Məşqlərdə var gücümüzlə çalışırıq, oyunlarda bütün gücümüzü ortaya qoyuruq ki, istəyimizə çataq. İşimizə ciddi yanaşırıq.

- Hər halda heç bir komanda I Liqaya düşməsə, çempionatda qalmaq uğrunda gərgin mübarizə görməyəcəyik...

- Bu barədə düşünmürük. Dediyim kimi, qarşıdamızda bəlli hədəfimiz var. Özünüz də görürsünüz ki, necə formadayıq. Bu tempdə də davam etmək lazımdır. Əlimizdən gələni edəcəyik ki, hər oyunda xal və xallar qazanaq.

İbrahim Cəfərov