Elvin Camalov: “Neftçi”də olmaq hər bir futbolçunun arzusudur”

“Neftçi” kimi tarixi zəngin olan böyük klubda olmaq çox böyük hissdir. Təbii ki, çox həyəcanlıdır. İnşallah, çox ümid edirəm ki, bu həyəcanı yenib komanda üçün faydalı olacağam”.

Futbolxeber.az saytının məlumatına görə, bu sözləri “Neftçi”nin yeni transferi Elvin Camalov klubun mətbuat xidmətinə açıqlamasında deyib.

29 yaşlı yarımmüdafiəçi “Neftçi”nin uğurları üçün əlindən gələni edəcəyini bildirib: “Ümid edir və inanıram ki, “Neftçi” daha da yuxarılarda olacaq. Daha yaxşı nəticələr qazanmaqda mən də pay sahibi olmaq üçün əlimdən gələnin ən yaxşısını edəcəyəm”.

O qeyd edib ki, hər bir futbolçunun arzusu “Neftçi”də olmaqdır: “Mən də buna nail olduğum üçün sevincliyəm. Burada olmaq böyük bir sevinc olduğu kimi, böyük bir məsuliyyət də tələb edir. Çünki “Neftçi”də azarkeşlərin istəyi, gözləntisi daim yuxarılardır. Mən də buradan azarkeşlərimizə söyləmək istəyirəm ki, dəstəklərini əsirgəməsinlər. İnanıram ki, azarkeşlərimiz də “Neftçi”ni sevdiyi kimi, hər bir futbolçuya qiymət verdiyi kimi, “Neftçi” cameəsinin əsas və sevilən bir futbolçusu olaraq mənə də dəstəklərini davam etdirəcəklər. Çünki “Neftçi” cameədir və burada uğura nail olacağıqsa, birlikdə nail olacağıq”.

E.Camalov vurğulayıb ki, “Neftçi” üçün avrokuboklara daha yaxın yol kuboku qazanmaqdır: “Hədəfimiz çempionatda oyundan-oyuna 3 xalı qazanıb, turnir cədvəlində daha yuxarıya qalxmaq və avrokuboklara vəsiqə üçün daha yaxın yol olan kubokda qalib olmaqdır. Ümid edirəm ki, azarkeşləri yaxşı oyunumla sevindirərəm”.