Elvin Cəfərquliyev: “Qırmızı vərəqə almağım aqressiv və istəkli olmağımdan irəli gəlir”

UEFA Avropa Liqasının VII turu çərçivəsində sabah Bakıda Rumıniyanın FCSB klubu ilə üz-üzə gələcək “Qarabağ”ın üzvü Elvin Cəfərquliyev oyunöncəsi mətbuat konfransında iştirak edib.

Futbolxeber.az saytının məlumatına görə, 24 yaşlı müdafiəçi əvvəlcə matç haqqında fikirlərini bölüşüb:

“Bir qədər həyəcanlıyam. İlk dəfədir ki, "Qarabağ"ın futbolçusu kimi ilk mətbuat konfransına qatılıram. Sabahkı oyuna ciddi hazırlaşmışıq, rəqibi tanıyırıq. Məşqçilərimizdən təlimatlarımızı almışıq. Azarkeşlərimizin qarşısında oynayırıq. Onları sevindirmək istəyirik. Çalışacağıq ki, qələbə qazanaq”.

Daha sonra E.Cəfərquliyev jurnalistlərin suallarını cavablandırıb:

- Fasilədən sonra ilk avrokubok matçıdır. Özünüzü oyuna hazır hiss edirsiniz?

- Əlbəttə ki, hazır hiss edirəm. Hazırlığımız çox yaxşı keçib. Həm fiziki, həm də psixoloji cəhətdən özümü yaxşı durumdayıq. Ümid edirəm ki, uğurlu bir matç keçirəcəm. Komandam üçün əlimdən gələni edəcəm.

- Hakimin güzəştə getməyən biri olduğu bildirilir. Bunu nəzərə almısınız?

- Hiss edirdim ki, mənə bu sual veriləcək. Hər bir oyuna ciddi hazırlaşıram. Qırmızı vərəqə almağım çox istəkli olmağımdan və aqressivliyimdən irəli gəlir. Amma öz üzərimdə işləyirəm. Bəzi yerlərdə çox aqressiv olmağım komandaya baha başa gəlir. Bunu bilirəm. Məşqçimin də mənə təlimatları olur”.