Rəşad Sadıqov: “6-7 komanda ilk üç yer uğrunda mübarizə aparacaq”

“Futbolçuların çıxışından razı qaldım. Maraqlı və baxımlı futbol alındı. Hər iki komandanın futbolçuları çox istəkli idi. Yaxşı yükləmə oldu. Çempionatda ilk oyunumuz “Araz-Naxçıvan”a qarşıdır. Çalışacağıq ki, həmin günə qədər komandamız tam yaxşı formada olsun. Amma komandamız tam formaya düşmək üçün 3-4 rəsmi oyuna ehtiyacımız var".

Futbolxeber.az saytının məlumatına görə, bu sözləri "Zirə"nin baş məşqçisi Rəşad Sadıqov “Qarabağ”a qarşı keçirilən yoxlama oyunundan (2:4) sonra deyib.

Maraqlıdır ki, yoxlama oyununda həm “Qarabağ”, həm də “Zirə” 8 legioner, 3 yerli futbolçu ilə oynayırdı. Görəsən, bu, sırf təsadüf idi? “Çempionat öncəsi tam heyətimiz formalaşmayıb. Zədəlilər, daha çox oynamağa ehtiyacı olan oyunçular var. Ona görə də limitə o qədər də önəm vermirdik. Amma çempionat oyununa yaxın əsas heyəti qərarlaşdıracağıq. Bizim üçün sonradan meydana daxil olacaq futbolçular da çox önəmlidir. Çalışacağıq ki, həmin günü həm ideal əsas heyəti, həm də sonradan matça daxil olacaq futbolçular ən yaxşı oyunlarını göstərsinlər”.

Sadıqov mövsümün ikinci hissəsindən gözləntilərini də açıqlayıb: “Təbii olaraq istəyirik ki, avrokuboklara düşək. Bu mövsüm çempionat daha rəqabətlidir. 6-7 komanda ilk üç yer uğrunda mübarizə aparacaq. “Qarabağ” çempionluğa əsas favoritdir. Bizi gərgin və maraqlı yarış gözləyir”.

O, AFFA-nın legioner limitini ləğv edəcəyi ilə bağlı yayılan xəbərə münasibət bildirmək istəməyib: “Rəsmi qərar və fikir yoxdur ki, onu şərh edim. Mənim işim məşqçilikdir. Limiti də təhlil etməmişəm ki, 7 olsa, 8 olsa, Azərbaycan futbolu üçün necə olar. Ona görə də dolğun cavab verə bilmirəm. Məni məşqçi olaraq daha çox özümə aid olan işlər maraqlandırır. Nə qərar olsa, biz də ona uyğunlaşacağıq”.

“Zirə”nin baş məşqçisi qış fasiləsinin müddətindən narazılıq edib: “Hazırlıq prosesinin müddəti məni qane etmədi. Mən ya ayyarımlıq, ya da iki həftəlik fasilənin tərəfdarıyam. Çünki bir ay fasilə olan tam ortada qalırsan. Nə futbolçulara düz-əməlli istirahət verə bilirsən, nə də hazırlaşa bilirsən. Amma şərtlər hamı üçün eynidir. Ona görə də bu, bəhanə ola bilməz. Vəziyyətdən maksimum uğurlu çıxmaq istəyirik”.

“Sizcə, avrokuboklara yollanmaq üçün minimum neçə xala ehtiyac olacaq?” sualını R.Sadıqov belə cavablandırıb: “Adətən baxırdın ki, 60 xal “üçlüy”ü göstərirdi. Ötən mövsüm rəqabət yüksək oldu. 58 xal da ikinciliyə kifayət etdi. Bu mövsüm bir az fərqlidir. “Araz-Naxçıvan”, “Turan Tovuz” çox xal toplayıb. Keçmiş illərdə ilk dövrədən sonra 28-30 xal yaxşı göstərici sayılırdı. Ötən mövsüm mövsümün ilk hissəsində 29 xal yığdıq və bu, sonda ikinci yeri tutmağa kifayət etdi. Bu mövsüm 30 xal yığmışıq və üçlüyə düşə bilməmişik. Bu mövsümün kriteriyası fərqlidir. Ona görə əvvəlcədən proqnoz vermək olmur”.