Qurban Qurbanov: "Futbol və siyasi baxımdan bu, çox vacibdir"

“Qarabağ”ın baş məşqçisi Qurban Qurbanov bu gün “Kəpəz”ə qarşı keçirilən yoxlama oyunundan (5:1) sonra jurnalistlərin suallarını cavablandırıb. Futbolxeber.az saytının əməkdaşının da iştirak etdiyi müsahibəni təqdim edirik:

- Əvvəcə hazırlığın gedişi və bugünkü oyun barədə fikirlərinizi bölüşərdiniz.

- Çox az vaxtdır yığışmışıq. Hələ hazırlığın az bir hissəsini geridə qoymuşuq. Bu günlərdə istədik ki, bir oyun keçirək və futbolçulara şərait yaradaq. Oyunçulara tapşırmışdıq ki, təsləməsinlər, ehtiyatlı oynasınlar. Hazırlıq üçün vaxtımız çox azdır. Bugünkü oyun komanda üçün faydalı oldu. Azər Bağırova təşəkkür edirəm ki, təklifimizi qəbul etdilər və bizimlə bu oyunu keçirdilər. Yanvarın 12-də “Zirə” ilə növbəti oyunu keçirəcəyik. Əsas odur ki, 17-də və 23-dəki oyunlara komandanı normal vəziyyətə gətirək.

- Zədəli futbolçuların vəziyyəti necədir?

- Bədavi Hüseynov hələ komanda ilə məşq etmir. Bəhlul və Veşoviçə  bugün 20-25 dəqiqə şərait yaratdıq. Zubirin neçə gündür temperaturu var idi. Yavaş-yavaş tam bərpa olunurlar. Aleksey İsayev də əməliyyat olunub, lakin ilk gündən məşq edir. Ona da ehtiyalı olmağı tapşırmışdıq.

- Benzianın yoxluğu nə ilə əlaqədardır?

- Anasının durumu ağırdır. Ona görə hələ qayıtmayıb. Xəbər göndərdi və biz də razılaşdıq ki, hələlik anası ilə olsun. Nə vaxt geri qayıdacağı hələ bilinmir.

- “Kəpəz”lə oyunda “Qarabağ” akademiyasının da bir neçə futbolçusuna şans verdik. Gənclərdən nə dərəcədə razısınız?

- Bir neçə futbolçu bizimlə məşqlərdə iştirak edir. Hələ daha çox çalışmalıdırlar. İstəklidilər, çalışqandılar, lakin daha diqqətli olmalıdırlar.

- Juninyonun transferi ilə bağlı son durum necədir?

- Hələ konkretləşməyib. Bəzi nüanslar var. Oyunçunun özünün istəyi də vacibdir. Əvvəl “Sevilya” ilə danışılmışdı. Sonra “Flamenqo” da təklif göndərdi. Danışıqlar gedir. Yəqin ki, qarşıdakı günlərdə məsələ yekunlaşacaq.

- Yeni transfer gözlənilirmi?

- Çox istəyirik. İşimizin daha çox hissəsini yeni oyunçulara ayırmışıq. Hələ ki alınması real görünmür. Son günlərin danışıqlarına görə belə deyirəm. Hələ vaxtımız var. Çalışacağıq nəsə edək.

- Avroliqadakı oyunların Juninyonun mümkün gedişinə təsiri oldu?

- Bəzən futbolçuları da, təklif göndərən klubu da nəzərə almaq lazımdır. Həm “Sevilya”, həm də “Flamenqo”ya futbolçumuzun gedişi “Qarabağ”ın böyüməsi, bu kluba diqqətin artırılması deməkdir. Son günlərdə İspaniya və Braziliya mətbuatında “Qarabağ” və Azərbaycan futbolu haqda xeyli müzakirələr gedir. Artıq digər futbolçularımızı da analiz edirlər. Keçmiş və indiki formaları müzakirə olunur. Ola bilər biz futbolçunu itirəcəyik. Lakin klub bu transferdən böyük uğur əldə edəcək. Yeni oyunçular da gələcəkdə “Qarabağ”a daha rahat gələcəklər. Hərtərəfli baxsaq, futbol və siyasi baxımından bu, çox vacibdir.

- Nəzərə alsaq ki, Redon Cica da Avroliqa oyunları üçün transfer olunmayıb, o zaman hücum xəttindəki problemləri necə həll etməyi düşünürsünüz?

- Variantlarımız var. Hansısa addım atmalıyıq. Dəfələrlə belə hallar olub və çıxış yolu tapmışıq. O mövqedə oynayan futbolçular var.

- Sizin üçün Juninyonun “Sevilya”ya, yoxsa “Flamenqo”ya getməyi önəmlidir?

- Əlbəttə, futbolçunun istəyi çox önəmlidir. Bəlkə bizim üçün “Sevilya” daha maraqlı olardı. Avropadır, bizə bəlkə daha yaxındır. Köklü klubdur. Dəvət etdiyimiz futbolçular da ispan, portuqal futboluna yaxındırlar. Lakin “Flamenqo” da köklü klubdur. Ronaldinyo kimi futbolçu ordan çıxıbsa, deməli, o klubun da böyük iş prinsipləri var. Mənim üçün ciddi fərqi yoxdur. Əsas oyunçunun ürəyincə olsun. O klubdakı perspektivi daha yaxşı olsun.

İbrahim Cəfərov