Ayxan Abbasov: “Onunla danışıqlarımız gedir, hələlik razılıq əldə olunmayıb”

“Hazırlığı Bakıda keçirik. Hələlik məşqlərimiz Mərdəkanda olur. Bəzən məşq yerini dəyişə də bilərik. “Qarabağ”la çempionat oyununda Bakıda üz-üzə gələcəyik deyə, yanvarın 17-nə qədər paytaxtda məskunlaşmışıq”.

Futbolxeber.az saytına açıqlamasında bu sözləri “Şamaxı”nın baş məşqçisi Ayxan Abbasov deyib.

Mövsümün ikinci yarısının hazırlığına dünəndən start verən bölgə təmsilçisi hələlik tam heyətlə məşq etmir: “Legionerlər sabah komandaya qoşulacaq. Artıq sabahdan tam heyətlə hazırlıq keçəcəyik. Hələ ki məşqlərdə yalnız yerli futbolçular iştirak edir”.

A.Abbasov yeni transferlərlə bağlı çalışmaların davam etdiyini vurğulayıb: “Rumın yarımmüdafiəçi Andrey Tırkoveanu ilə danışıqlarımız gedir. Hələlik razılıq əldə olunmayıb. Ümid edirəm ki, 1-2 günə məsələ yekunlaşacaq. Danışıq apardığımız başqa futbolçular da var. Lakin hələlik real nəsə yoxdur”.