Ayaz Quliyev: “Özümüz özümüzə problem yaradırıq”

“Özümüz özümüzə problem yaradırıq. Çox sadə qollar buraxdıq. Məğlubiyyətimizdə başqa heç bir səbəb yoxdur”.

Futbolxeber.az saytına açıqlamasında bu sözləri “Sabah”ın yarımmüdafiəçisi Ayaz Quliyev Azərbaycan Premyer Liqasının XVIII turunda “Şamaxı”ya 1:3 hesabı ilə uduzduqları oyun barədə danışarkən deyib.

O, geridə qalan iki dövrəni komandası üçün qısaca belə dəyərləndirib: “Olmalı olduğumuz yerdə deyilik. 18 turdakı çıxışımızı yalnız belə qiymətləndirə bilərəm”.

28 yaşlı futbolçu Vasili Berezutskinin gəlişinin komandaya müsbət təsir etdiyini vurğulayıb: “Yeni baş məşqçinin gəlişini ilə komandada müsbət dəyişikliklər olub. Bu, hamıya aydındır. Komandada ab-hava əladır. Berezutskinin gəlişindən sonra ardıcıl bir neçə matçda yaxşı nəticələr qazandıq. Lakin təəssüf ki, yalnız son turda uduzduq. Niyə belə alındığını bilmirəm. Bəlkə də konsentrasiya çatmadı. Çünki qapımızda çox asanlıqla qollar gördük. Məğlubiyyətə görə özümüz günahkarıq”.

A.Quliyev əminliklə bildirib ki, mövsümün ikinci hissəsində vəziyyəti müsbətə doğru dəyişəcəklər: “Biz hər matça yalnız qələbə üçün çıxırıq. Qarşıdakı iki dövrədə vəziyyətimizi 100 faiz yaxşılaşdıracağıq. Buna şübhə etmirəm. Əslində, indi də pis durumda deyildik. Yalnız “Şamaxı”ya məğlubiyyət gözlənilməz oldu və planlarımızı pozdu”.

Fərəc Aslanov