Cavadov: “Rəqib çox üstün idi”

“Çox yaxşı komandaya qarşı oynadıq. Rəqibi təbrik edirəm. Bu, bizim üçün bir təcrübədir. Yuxarı pillələr uğrunda oynamaq üçün daha çox işləmək lazımdır”.

Futbolxeber.az saytının məlumatına görə, bu sözləri “Sumqayıt”ın baş məşqçisi Vaqif Cavadov Azərbaycan Premyer Liqasınını XVII turunda “Qarabağ”a 0:5 hesabı ilə uduzduqları oyundan sonra deyib.

Məğlubiyyətə baxmayaraq, o, komandasından razı qaldığını bildirib: “Fərdi səhvlər oldu. Bu, futboldur. Rəqib çox üstün idi. Ümid edirəm ki, bu səhvlərdən nəticə çıxaracağıq. Qarşıda "Kəpəz"lə çətin səfər oyunu var. Yaxşı hazırlaşmaq üçün gün vaxtımız var”.

V.Cavadov ehtiyat qapıçı Rəşad Əzizliyə şans verməməsi barədə bildirib: “Rəşadla heç bir problemim yoxdur. Mən gələndə komandaya yeni qoşulmuşdu. Ondan əvvəl ikinci qapıçı Xəyal Fərzullayev idi. Hər üç qapıçıya çox güvənirəm. Şans yaransa, Rəşad da, Xəyal da meydanda olacaq”.

“Müvəqqəti baş məşqçi təyin olunmusuz. Müqaviləniz barədə məlumatımız yoxdur. Rəhbərliklə heyətlə bağlı müzakirələriniz olub?” sualını Vaqif Cavadov belə cavablandırıb: “Müqaviləmin şərtlərindən heç mənim də xəbərim yoxdur. Mən öz işimi görürəm. Komanda uda da bilər, uduza da bilər. Bu gün bizim günümüz deyildi. İnanıram ki, növbəti matçlarda daha yaxşı olacağıq. Bu gün heyətimizdə 13 legioner futbolçu var. Bir-iki dəyişiklik edə bilərik. Amma ümumi olaraq yaya kimi bu futbolçularla davam etməliyik”.