“Samir Abasovun mənə güvəni yox idi, ona görə də qol vurduğum üçün çox sevincliyəm”

“Sumqayıt”ın hücumçusu Kamran Quliyevin Futbolxeber.az saytına müsahibəsi

- Azərbaycan Premyer Liqasının XVI turunda “Neftçi” üzərində 2:0 hesablı qələbə qazandınız. Qalibiyyəti necə şərh edərdin?

- “Neftçi”yə qarşı qarşı oynamaq həmişə çətin olub. Çünki tarixi klublarımızdan biridir. Nə qədər eniş dövrü yaşasa da, flaqmanımızdır. Çox sevinirik ki, azarkeşlərimizin möhtəşəm dəstəyi sayəsində qələbə qazandıq. Fanatlar bu gün həqiqətən də 12-ci oyunçu oldular.

- “Sumqayıt” üçün ilin son ev oyununda qələbə nə qədər vacib idi?

- Oyunlara fərq qoymuruq. Hamısına eyni cür hazırlaşırıq. İlin son ev oyununda azarkeşlərimizi sevindirdiyimiz üçün çox şadıq.

- “Neftçi”yə qol vurmaq necə hissdir?

- Tək “Neftçi”yə yox, həmişə qol vuranda sevinirəm. Çünki hücumçuyam. “Neftçi”yə qol vurduqda isə ikiqat yox, üçqat sevindim.

- Mövsümdə üçüncü dəfə qol vurdun. Maraqlıdır ki, meydanda yaxşı mübarizə aparsan da, 5 turdan bir fərqlənirsən. Bu, nə ilə bağlıdır?

- Mövsümün əvvəlində çox şans qazanmırdım. Səbəbi budur. Futbolçu nə qədər çox oynasa, bir o qədər də özünəgüvən artar. Mən də əlimdən gələni edirəm ki, komandama faydalı olum. Qol vurdum, ya vurmadım, əsas komandamızın qələbəsidir. 

- Samir Abasov amili “Neftçi” ilə matçda motivasiyanızı artırmışdı?

- Uşaqları deyə bilmərəm, amma mənim üçün bu məqam rol oynadı. Çünki “Sumqayıt”da işləyərkən mənə güvəni yox idi. Çıxıb qol vurduğum üçün çox süevincliyəm. Özümü sübut elədiyimi düşünürəm.

- Qarşıdan 2 səfər oyunu gözləyir. “Qarabağ” və “Kəpəz”lə matçlardan gözləntilərin nədir?

- Hələ ki 2 günlük istirahətdəyik. Dincələk, qayıdandan sonra qarşıdakı matçlar barədə düşünəcəyik. İstənilən halda hər iki matça da qələbə üçün çıxacağıq.

- Necə düşünürsən, belə davam etsə, səni tezliklə millidə görə bilərik?

- Hər bir futbolçunun arzusudur ki, millinin şərəfini qorusun. Bu, mənim də ən böyük arzularımdan biridir. Son pillə oradı. Mən də istərdim sonuncu pilləyə doğru addımlayım və orada qalım.

Fərəc Aslanov