İqor Ribeyro: “Araz-Naxçıvan” onun sayəsində buralara gəlib çıxıb”

“Süni örtüklü meydanda oynamaq bizim üçün çətindir. Buna öyrəşməmişik. Ona görə də “Səbail”ə qarşı oyunun çətin keçəcəyini əvvəldən bilirdik. İlk dəqiqədən sona qədər yaxşı mübarizə apardıq. Yekunda da qalib gəldik. Buna görə sevinirik”.

Futbolxeber.az saytına müsahibəsində bu sözləri “Araz-Naxçıvan”ın müdafiəçisi İqor Ribeyro Azərbaycan Premyer Liqasının XVI turunda səfərdə “Səbail” üzərində qazandıqları 2:0 hesablı qələbəni şərh edərkən deyib.

Braziliyalı futbolçu mövsümün ilk turunda “Qarabağ”a uduzduqdan sonra sürət yığmalarının səbəbini belə izah edib: “İlk oyunumuz çətin olmuşdu. Çünki mövsümdə birinci matçı idi, hamı bir-birini yeni tanımağa başlamışdı. Hər gün üzərimizdə çalışırıq. Baş məşqçimiz də bu işdə bizə kömək olur. Onun sayəsində buralara gəlib çıxmışıq. Hazırda lider olsaq da, hələ heç nəyə nail olmamışıq. Yolumuza davam edirik”.

28 yaşlı futbolçu ötən mövsümlə müqayisədə “Araz-Naxçıvan”ın indi daha güclü olduğunu vurğulayıb: “Yaxşı oyunçularımız var. İndi ötən mövsümlə müqayisədə daha yaxşı vəziyyətdəyik. Bu cür də davam etməyə çalışacağıq. İstəyirik ki, uğurlu oyunlarımızın davamını gətirək. Çətin olsa da, buna nail olmaq üçün əlimizdən gələni edəcəyik”.

“Araz-Naxçıvan”ın çempionluq üçün oynaması nə dərəcədə realdır?” sualını İ.Ribeyro belə cavablandırıb: “Hər şey ola bilər. Biz də Avropaya yollanmaq üçün çalışırıq. Məşqlərdə də dayanmadan işləyirik. Kim çempion olmaq istəməz ki? Necə alınacağını isə zaman göstərəcək”.

O, ilin son iki oyunu - “Sabah” və “Qarabağ”a qarşı matçlar barədə bunları söyləyib: “Futboldur, uda da bilərik, uduza da bilərik. Öncədən proqnoz vermək olmur. Ancaq dəqiq olan odur ki, maksimum gücümüzü meydanda ortaya qoyacağıq və sona qədər döyüşəcəyik. Necə alınacağını isə zaman göstərəcək”.

Son iki mövsümdə “Araz-Naxçıvan”ın heyətində ən yaxşılardan olan braziliyalı müdafiəçi digər klublardan təklif almadığını qeyd edib: “Hazırda “Araz-Naxçıvan”dayam və bu komandanın uğurları üçün çalışıram. Karyeramı burada da davam etdirəcəm. Keçən illə müqayisə etsək, mənə görə bu mövsüm daha yaxşıyam. Hansısa klubdan təklif almamışam. Yalnız “Araz-Naxçıvan”a fokuslanmışam”.