Adıgözəlov ofsaytda qaldı: Qasımov Moskvada Berezutski ilə razılıq əldə edib - EKSKLÜZİV

“Sabah”ın yeni baş məşqçisi Vasili Berezutskinin təyinatının detalları məlum olub.

Futbolxeber.az saytının əldə etdiyi məlumata görə, rusiyalı mütəxəssislər danışıqlar bir müddətdir aparılırdı.

İlk öncə onu qeyd edək ki, Krunoslav Renduliçin gəlişində pay sahibi olan klub prezidenti Maqsud Adıgözəlov xorvat mütəxəssisin uğursuzluğuna görə bu dəfə ofsaytda qalıb.

Vasili Berezutski ilə danışıqları AFFA İcraiyyə Komitəsinin üzvü, İTV-nin baş direktoru Balakişi Qasımov aparıb. Hətta ötən həftə bu məqsədlə o, Moskvaya yollanıb. Rusiya paytaxtında Balakişi Qasımovla Vasili Berezutski arasında baş tutan danışıqlar müsbət yekunlaşıb.

Qeyd edək ki, daha əvvəl “Sabah”ı çalışdıran Murad Musayevin də gəlişi məhz Balakişi Qasımovun təşəbbüsü ilə baş tutmuşdu. 2022-ci ilin yanvarında Musayev “MATÇ TV”yə müsahibəsində bu barədə demişdi: “İlk dəvət tanınmış ekspert Balaş Qasımovdan gəlib. Zəng etdi, "Krasnodar"a həmişə rəğbət bəslədiyini dedi. Daha sonra "Sabah" kimi bir layihənin mənə maraqlı olub-olmamasını dəqiqləşdirdi. Görünür, klub prezidenti ilə dostdur və bu komandaya azarkeşlik edir. Bir az fikirləşdim, amma eyni zamanda “Sabah”ın harada oynadığını və məşq etdiyini gördüm, şəhərə göz gəzdirdim. Və sonda razılıq verdim. Düzünü desəm, Qasımov mənim cavabıma xeyli təsir göstərdi. Məni “Nə? Harada? Nə zaman?” intellektual oyunları ilə bağlı həm Bakıya, həm də Moskvaya dəvət etdi”.

Əlavə edək ki, Vasili Berezutski bu gün "Sabah"la 2,5 illik müqavilə imzalayıb.