Rəşad Sadıqov: “Rəqibin müdafiə xəttini yara bilmirdik”

“Turnir cədvəlini nəzərə alsaq, olduqca vacib matç idi. Əsas rəqiblərimizdən biri ilə oynayırdıq. Qələbəyə köklənmişdik. Əslində hər şey bizim üçün yaxşı gedirdi. Birinci hissədə üstünlük biz tərəfdə idi. Rəqib daha çox oyunu əks-hücumlarda qurmuşdu. Bir neçə təhlükəli hücumumuz oldu. Amma rəqibin müdafiə xəttini yara bilmirdik. Mənə məlum olmayan səbəbdən ikinci hissəyə çox passiv başladıq. Həmin dəqiqələrdə standart vəziyyətdən qol buraxdıq. Ondan sonra yenə üstünlüyü ələ aldıq, çoxsaylı hücumlarımız oldu. Dirəkdən dönən topumuz var. Təəssüflər olsun ki, hesabı bərabərləşdirə və ya qələbə qazana bilmədik. Çox vacib oyunda məğlub olduq. Üç gün sonra "Qarabağ"la səfər matçımız var”.

Futbolxeber.az saytının məlumatına görə, bu sözləri “Zirə”nin baş məşqçisi Rəşad Sadıqov Azərbaycan Premyer Liqasının III turundan təxirə salınmış oyunda “Araz-Naxçıvan”a 0:1 hesabı ilə uduzduqları görüş barədə danışarkən deyib.

O, komandasının potensialının olduğunu bildirib: “Amma bəzi epizodlarda konsentrasiya itkisi olur. Xüsusilə də bu il standart vəziyyətlərdə çox qollar buraxmışıq. "Zirə"də olduğum 4 ildə belə vəziyyətlərdən qapımızda az qol görürdük. Həftənin bir gününü standart vəziyyətlərə həsr edirik. Oyunçularımız tapşırılan rəqib futbolçuları tutmurdu. Səbəbini araşdıracağıq”.

Sadıqov "Araz-Naxçıvan"ın uğurlu çıxışının onu təəccübləndirmədiyini vurğulayıb: “Yay seleksiyasından bəlli idi ki, komanda bu mövsüm iddialı olacaq. Aramızda yetərincə xal fərqi yarandı. "Sabah" və "Neftçi" bizdən geridədir. Ona görə də vəziyyət bir az da məsuliyyətlidir. Qarşıdakı oyunlarda çalışacağıq ki, xal ehtiyatımızı maksimum artıraq”.