Milli Məclisdə Azərbaycan futbolunun müzakirəsi

Milli Məclisin dünənki plenar iclasında Azərbaycan idmanı, daha dəqiq desək, sərbəst güləş və futboldakı uğursuzluqlardan danışılıb.

Futbolxeber.az saytının məlumatına görə, millət vəkili Fazil Mustafa bu günlərdə tarixində ikinci dəfə dünya çempionu olan Azərbaycan güləş millisini təbrik edib. Eldəniz Əzizlinin dördüncü dəfə dünya çempionu olduğunu qeyd edən deputat sərbəst güləşçilərimizin uğursuzluğunu qabardıb. O, sərbəst güləşimizin son illər tənəzzülə doğru getməsini legioner məsələsi ilə əlaqələndirib: “Hansısa sistemimizi legioner üzərində qururuqsa, bu uğurun davamı gəlmir. Legioner bir neçə ildən sonra çıxıb gedir, məktəb yarada bilmir, nəticədə də bu uğursuzluq yaşanır”.

Fazil Mustafa eyni halın futbolda da yaşandığını bildirib: “Əvvəl xeyli sayda milliləşdirilmiş futbolçumuz oldu. Lakin bu gün millidə onların sayı bir-iki nəfər olar, ya olmaz”.

Millət vəkili Azərbaycanda futbolçu yetişməməsini ölkəmizin imicinə də təsir etdiyini söyləyib: “Dünyanın müxtəlif ölkələrində 70 gürcü futbolçu legioner həyatı yaşayır. Lakin biz dünyaya transfer olunacaq futbolçu yetişdirə bilmirik. Bunun səbəblərini mütləq müzakirə etməliyik. Çünki bu, təkcə bizim milli komandalarımızın taleyi deyil, həm də Azərbaycanın imici məsələsidir”.

F.Mustafa çıxışının sonunda daha bir vacib məqama toxunub: “Orta məktəblərə, universitetlərə baş çəkirik. Eldəniz Əzizli 4 dəfə, Hacı Əliyev 3 dəfə dünya çempionu olub. Lakin universitetlərin, məktəblərin heç birinin girişində onların şəklini görməzsən. Sevindiricidir ki şəhidlərimizin hamısının şəkli var. Şahirdlər onlardan örnək götürürlər. Uşaqlar görürlər ki, qəhrəmanlarımız unudulmur. Bəs biz niyə yaşayan qəhrəmanlarımızı misal göstərmirik? Ona görə də baboşlar-mamoşların təbliğatı gedir”.

Millət vəkilinin parlamentdə Azərbaycan futbolunun problemlərini qabartması çox müsbət məqamdır. Çünki görünən odur ki, artıq yarımildən çoxdur Azərbaycan futbolunda hakimiyyətdə olan qüvvələr hələlik yalnız strategiya axtarışındadırlar...