Elmar Baxşıyev: “Onun həm insani, həm də futbolçu keyfiyyətləri məni qane edir”

“Qara "Neftçi"dən ayrıldıqdan sonra maraqlandığımız, transferini düşündüyümüz futbolçulardan idi. Onunla danışığımız olmuşdu. Dünən bu proses yekunlaşdı və bu gün mövsümün sonuna qədər nəzərdə tutulan müqavilə imzalandı”.

Futbolxeber.az saytına açıqlamasında bu sözləri “Araz-Naxçıvan”ın baş məşqçisi Elmar Baxşıyev Qara Qarayevin transferinə münasibət bildirərkən deyib.

Mütəxəssis qeyd edib ki, istənilən komanda hər zaman güclənməyə ehtiyac durur: “Bizim də həmin mövqedə ciddi itkilərimiz oldu. Karlos Jatoba mövsümün ilk oyunundan sonra zədələndi və əməliyyat olundu. Onun dönüşü qışdan sonraya gözlənilir. Vadim Abdullayev də dünən əməliyyat olundu, bir aydan tez komandaya qoşulmayacaq. Belədə bu transfer yerinə düşdü”.

E.Baxşıyevin Q.Qarayevdən gözləntiləri böyükdür: “Qara təcrübəli futbolçudur. İllərdir "Qarabağ" və "Neftçi" kimi iddialı klublarda və Azərbaycan millisində çıxış edib. Onun həm insani, həm də futbolçu keyfiyyətləri məni qane edir. Təbii ki, komandamıza kömək edəcəyinə inanırıq”.

“Araz-Naxçıvan”ın baş məşqçisi “Qara Qarayevi nə vaxt meydanda görə biləcəyik?” sualını belə cavablandırıb: “O, peşəkar və təcrübəli futbolçudur. Düzdür, bir müddətdir komanda ilə məşq etmir və oyun keçirmir. Bunu qısa vaxtda yoluna qoyacağına əminəm. Bu işdə biz məşqçilər də Qaraya kömək edəcəyik”.

İbrahim Cəfərov