"Ayaks"ın baş məşqçisi: "Qarabağ" yalnız 0:3-dən sonra təslim oldu"

"Təbii ki nəticədən razıyıq. Qələbə qazandıq. Oyunçularımın performansından razı qaldım".

Futbolxeber.az saytının məlumatına görə, bu sözləri "Ayaks"ın baş məşqçisi Françesko Farioli Avropa Liqasının Liqa mərhələsinin 3-cü turunda "Qarabağ"ı 3:0 hesabı ilə məğlub etdikləri oyundan sonra təşkil olunan mətbuat konfransında deyib.

Daha sonra o, jurnalistlərin suallarını cavablandırıb:

- Hakimin performansını necə dəyərləndirirsiniz? Niderland çempionatında bu cür penalti, yaxud qırmızı vərəqə verilir?

- Biz heç vaxt hakimlər barədə danışmırıq.

- İlk hissədə komandanızın oyunundan nə dərəcədə razı qaldınız?

- Birinci hissədə "Qarabağ" oyuna fantastik başladı. Bunu gözləyirdik. Dünən də işimizin heç də asan olmayacağını demişdim. Lakin "Qarabağ" azlıqda qaldıqdan sonra oyunun gedişatı dəyişdi.

- Qələbədə hansı amil həlledici oldu?

- Bu, sadəcə bir elementlə bağlı deyil. İlk qoldan sonra daha rahat oynadıq. Daha çox qol şanslarımız oldu. Azlıqda qalsa da, "Qarabağ" təzyiqləri davam etdirirdi. Yalnız 0:3-dən sonra onlar təslim oldular.