Qara Qarayev qərarını qışda verəcək

"Neftçi”dən ayrılan Qara Qarayevin karyerasını bitirməsi haqda yayılan xəbərlər həqiqəti əks etdirmir.

Futbolxeber.az saytının əldə etdiyi məlumata görə, təcrübəli yarımmüdafiəçi qışa qədər gözləmə mövqeyi tutub. Belə ki, çempionatda yaranacaq fasilə zamanı Qarayev xidmətində maraqlı olacaq klublarla danışıqlar aparacaq. Yalnız o zaman hər hansı bir klubla razılıq əldə olunmasa, futbolçu karyerasını bitirə bilər. Qışa qədər təcrübəli yarımmüdafiəçi formada qalmaq üçün fərdi məşqlər edir.  

Əlavə edək ki, son günlər Qara Qarayevin danışıq apardığı klublarla maddi məsələlərlə razılıq əldə etmədiyi və məhz bu səbəbdən komandasız qaldığı deyilir. Lakin yayılan bu xəbər də həqiqəti əks etdirmir. Belə ki, Qara Qarayevin keçidinin baş tutmaması heç də maddi məsələlərlə bağlı deyil. Ümumiyyətlə, futbolçunun gələcək karyerası ilə bağlı qəbul edəcəyi qərarda maddiyyat rol oynamır.