Kaxaber Sxadadze: "Bu cür meydanda oynamaq olduqca çətindir"

"Əlbəttə, bu cür meydanda oynamaq olduqca çətindir. Komanda öz oyununu göstərə bilmir. Futbolçuların zədələnmə ehtimalı çox olur".

 

Futbolxeber.az saytının məlumatına görə, bu sözləri "Qəbələ"nin baş məşqçisi Kaxaber Sxadadze 1-ci liqanın 4-cü turunda səfərdə "Bakı Sportinq"ə qalib gəldikləri oyundan sonra deyib.

 

Gürcüstanlı mütəxəssis 2:0 hesablı qələbəni belə şərh edib: "Rəqib komanda evdə oynayırdı. Müəyyən mənada bu onlar üçün üstünlük idi. Ümumiyyətlə, "Qəbələ"yə qarşı bütün klublar xüsusi motivasiya ilə oynayırlar. Hər oyun maksimum gücümüzlə hazırlaşmağa çalışırıq. Çıxdığımız bütün matçlarda əlimizdən gələni edib əsas məqsədimiz olan qələbəni əldə etməyə can atır, bunun üçün mübarizə aparırıq. Bu dəfə də istəyimizə çatdıq. Komandam yaxşı oyun göstərdi, futbolçularımdan razıyam".

 

Qeyd edək ki, "Qəbələ" bu qələbə ilə xallarını 10-a çatdıraraq 2-ci pilləyə yüksəlib.