Bədavi Hüseynov: “Bəlkə Emin də penaltini qaçıracaqdı...”

Milli komandamızın müdafiəçisi Bədavi Hüseynovun Futbolxeber.az saytına müsahibəsi

- İsveçlə oyunda alınan 1:3 hesablı məğlubiyyəti necə şərh edərdiniz?

- Bilirdik ki, bizi güclü rəqib gözləyir. İsveç millisinin heyətində yaxşı oyunçular var. Matça yaxşı başladıq. Bir qədər bəxtimiz gətirmədi. Yarım metrdən qapıya düşə bilmədik. Sonradan rəqib üstünlüyü ələ aldı. Fasiləyə qədər qol vura bilərdik. Təəssüf ki, penaltidən yararlana bilmədik. Bəxtimiz gətirmədi. Hər şey edirdik, lakin heç cür qol vurmaq mümkün olmadı. Yeni baş məşqçinin rəhbərliyi altında meydana çıxmışdıq. Bəzi tapşırıqları yerinə yetirmək alınırdı, bəzilərini yox. İndi səhvlərimizdən nəticə çıxarmalıyıq ki, Slovakiya ilə matçda daha uğurlu çıxış edək.

- Start heyətində “Qarabağ”ın 6 futbolçusu yer almışdı. Lakin bu amil də millimizə kömək etmədi...

- Müdafiə xətti tamamilə “Qarabağ”ın oyunçularından qurulmuşdu. Məğlubiyyətə konkret səbəb göstərmək çətindir. Belə baxanda müdafiədə olunurduq, əks hücumlara çıxırdıq, qol epizodları yaradırdıq. Lakin sonluqda nəsə çatışmırdı. Çalışacağıq bunu düzəldək. Düzdür, “Qarabağ”ın oyunçuları start heyətində çoxluq təşkil edirdi. Lakin biz millidə çox az birlikdə oynayırıq.

- Komandanın təcrübəli üzvlərindən biri kimi penalti epizodunda yaşananları necə dəyərləndirərdiniz?

- Penaltiləri Emin də, Ramil də yerinə yetirir. O epizodda da öz aralarında danışdılar. İstəməzdim bu məsələ çox uzansın. Futbolda belə hallar olur. Ramil də istəyir ki, qol vursun, özünüinamlı olsun. Emin də zərbəni yerinə yetirə bilərdi. Lakin jest etdi. Bəlkə Emin də penaltini qaçıracaqdı... Bu, lotoreyadır.

- Slovakiya ilə matçdan gözləntiləriniz nədir?

- İsveçlə matçda çox güc itirdik. Buna görə də ilk növbədə bərpa olunmalıyıq. Bizi rəqib meydanında çox çətin oyun gözləyir. Slovakiya son Avropa çempionatında yaxşı təsir bağışlayıb. Güclü rəqibdir. Əlimizdən gələni edəcəyik ki, layiqli oynayaq və vətənə yaxşı əhval-ruhiyyə ilə qayıdaq.

- Avrokuboklar, yerli çempionat və Millətlər Liqası - bu gərgin qrafika dözmək nə dərəcədə çətindir?

- Öyrəncəliyik. Artıq illərdir bu cür sıx qrafikdə oynayırıq. Həm avrokuboklarda mübarizə aparırıq, həm də daxili çemopionatda. Üstəlik də, millinin oyunları. Düzdür, millinin bəzi üzvləri bu cür sıx qrafikə öyrəşməyib. Amma dediyim kimi, bizim üçün bu, ilk hal deyil. Xüsusən də Elvin Cəfərquliyev, Toral Bayramov, Bəhlul Mustafazadənin adını çəkərdim. Onlar daim oynayırlar. Bütün bunları nəzərə alanda Slovakiya ilə matçın çətin keçəcəyi görünür. Ona görə də ilk növbədə əlimizdən gələni etməliyik ki, itirdiyimiz gücü tez bərpa edək.

Fərəc Aslanov