Santuş məğlubiyyəti şərh etdi: "Hücumsan 100, müdafiədən 50 faiz razıyam"

Futbolxeber.az saytının məlumatına görə, bu sözləri milli komandamızın baş məşqçisi Fernandu Santuş UEFA Millətlər Liqasının qrup mərhələsi çərçivəsində  bu gün Tofiq Bəhramov adına Respublika Stadionunda İsveçə 1:3 hesabı ilə məğlub olduqları oyun barədə danışarkən deyib. 

Daha sonra portuqaliyalı mütəxəssis jurnalistlərin suallarını cavablandırıb:

- Penalti zərbəsini vurmaq Ramil Şeydayevin qərarı idi?

- Mən oyundan qabaq da, penalti olanda da, Emin Mahmudov deyirdim.

- Görmək istədiyinizin neçə faizini gördünüz?

- Hücum oyunumuzdan 100 faiz razıyam. Futbolçular tapşırıqlarımı yerinə yetirdilər. Daim qol vurmağa cəhd edirdilər. Müdafiə planında isə 50 faiz razıyam. Əslində, pis deyildik. Sadəcə müdafiənin təşkilində problem var idi və tez-tez top itirirdik. Azərbaycan millisi 4 səhvə yol verdi, İsveç isə 20 səhvə. 

- Heyəti açıqlayanda demişdiz ki, Azərbaycan millisi ölkənin bayrağı, himni üçün mübarizə aparmalıdır. Amma bir komandada ki, heyətin yarısı himni oxumursa, o komanda necə Azərbaycanın adı, bayrağı üçün mübarizə apara bilər?

- Mən sizinlə müəyyən mənada razılaşmıram. Hamı qələbə qazanmaq istəyirdi. Oyunçular əllərindən gələni etdilər.

- Qapıçı seçimində həlledici amil nə oldu? Onun çıxışından razı qaldınız?

- Ondan razıyam. Bir çox epizodları qutardı. Amma bu komanda oyunudur.

- Emin Mahmudovu əvəzləyəndə nəyi dəyişmək istəyirdiz?

- Oyunun gedişatına uyğun dəyişiklik etdim.

- Penalti epizodunda Emin Mahmudovdan topu aldığı üçün Ramil Şeydayevi cəzalandıracaqsız, yoxsa Eminin özünü?

- Komandadaxili məsələdir. Sabah bununla bağlı müzakirə aparacağıq.