Stefan Aka: “Osiyek”lə səfərdəki matçın nəticəsi barədə düşünməməliyik”

“Zirə”nin müdafiəçisi Stefan Akanın Futbolxeber.az saytına müsahibəsi

- Azərbaycan Premyer Liqasının ikinci turunda “Sabah” üzərində 2:0 hesablı qələbə qazandınız. Əsas rəqiblərdən birini çətinlik çəkmədən üstələyəcəyinizi gözləyirdinizmi?

- Biz həm birinci, həm də ikinci hissədə yaxşı oynadıq. Matç asan keçmədi. Belə olmayacağını da bilirdik. Çünki “Sabah” yaxşı rəqibdir. Keyfiyyətli futbolçulardan təşkil olunub. Xarakter nümayiş etdirdik. Bütün oyuna nəzarət bizdə idi. Qalib gəldiyimiz üçün xoşbəxtik.

- “Sabah”la matçda komandanı meydana kapitan kimi çıxarmışdınız. Daşıdığınız sarğı məsuliyyətinizi daha da artırır?

- Baş məşqçimizə təşəkkür edirəm ki, mənə etimad göstərib. Komandanın kapitanlarından biri də mənəm. Mən də etimadı doğrulmaq üçün əlimdən gələni etməyə çalışıram. Hər zaman komandama faydalı olmaq istəyirəm.

- Hazırda “Qarabağ”la birgə şərikli lidersiniz. Proqnozlaşdırmaq olar ki, bu mövsüm də turnir cədvəlində Ağdam klubuna ən yaxın komanda “Zirə” olacaq?

- Düşünmürəm ki, “Qarabağ”la mübarizə aparacaq yeganə komanda bizik. Çempionatda keyfiyyətli kollektivlər var. Ona görə də mövsüm çox çətin və gərgin keçəcək.

- “Sabah” üzərində qələbə “Osiyek”la matçdan öncə əhval-ruhiyyənizi daha da artıracaq?

- Təbii ki, qələbə qazanmaq hər zaman xoşdur. Vacib 3 xal qazandığımız üçün sevinirik. Artıq bütün diqqətimizi “Osiyek”lə matça yönəltmişik.

- Xorvatiya təmsilçisi ilə matçdan gözləntiləriniz nədir?

- İlk matçda səfərdə heç-heçə etmişik. Ola bilər kimsə düşünsün ki, müəyyən qədər üstünlüyümüz var. Lakin cavab matçı çox çətin keçəcək. Çünki “Osiyek” güclü rəqibdir. Bunu ilk matçda da gördük. Biz də növbəti mərhələyə yüksəlməyə qadirik. Buna görə də meydanda bütün gücümüzü qoyacağıq. Mərhələ adlamaq üçün sona kimi vuruşacağıq.  

- “Zirə” cütün taleyini xeyrinə həll etmək üçün ilk növbədə hansı amillərə diqqət yetirməlidir?

- İlk dəqiqələrdən rəqibi təzyiqdə saxlamalı, səfərdəki matçın nəticəsi barədə düşünməməliyik. Pressinq tətbiq etməli, aqressiv olmalıyıq. Baş məşqçimizin tapşırıqlarını yerinə yetirə bilsək, istəyimizə çatarıq.

- Yeni mövsümə əla start verməsinə baxmayaraq, avrokubok matçlarında “Zirə” layiq olduğu azarkeş dəstəyini görmür. “Osiyek”lə vacib oyunda stadionu doldurmaları üçün fanatlara çağırış etmək istərdiniz?

- Biz avrokuboklarda təkcə özümüzü yox, ümumilikdə Azərbaycanı layiqincə təmsil etməyə çalışırıq. Lakin azarkeş məsələsi tək bizlə bağlı deyil. Təbii ki, fanatların stadiona gəlişi bizim üçün əlavə motivasiyadır. Onlarla daha güclü oluruq. Ona görə çox istərdim ki, qarşıdakı matçda azarkeşlərin güclü dəstəyini hiss edək.

İbrahim Cəfərov