Samir Abasov: “VAR hara baxır?”

“İkinci hissədə qol vurmaq üçün çox əziyyət çəkdik. Əfsuslar olsun ki, oyun alınmadı. Oyunda yaxşı dinamika var idi. Futbolçuların basqıya reaksiya verməsi məni qane etdi. Onlara təşəkkür edirəm. Nəticəyə görə çox üzülürlər. Birinci hissədə bir-iki nəfərin zənciri qırması rəqibin üstünlüyünə çevrilirdi. Belə şeylər də olacaq. Bu da bir təcrübədir. İkinci hissədə oyun tam nəzarətimiz altında keçdi. Çempionat yeni başlayıb. Ümid edirik ki, hər şey yaxşı olacaq”.

Futbolxeber.az saytının məlumatına görə, bu sözləri “Sumqayıt”ın baş məşqçisi Samir Abasov Azərbaycan Premyer Liqasının ikinci turunda “Turan Tovuz”a 0:1 hesabı ilə uduzduqları oyun barədə danışarkən deyib.

Təcrübəli mütəxəssis ehtiyat oyunçular skamyasının kasad olması haqda bunları söyləyib: “Dəfələrlə demişəm, yenə təkrarlayıram. Bu haqda mənə sual verməyin. Transfer yoxdursa, belə davam edəcəyik. Transfer olmayacaq deyə məqsədimizdən dönməyəcəyik. Bir oyunda məğlub olmuşuq. Çempionat yeni başlayıb. Bu gün üçün çox möhkəm komandayıq”.

O, Vuynoviçin qol hesabını aça bilməməsinə belə münasibət bildirib: “Tək onluq deyildi. Bu gün hücum xəttində çox şey alınmırdı. Hücumameyilli oyunçulara irad bildirə bilmərəm. İlk hissədə cinah müdafiəçilərimiz aktiv deyildi. İkinci hissədə isə rəqib qapanandan sonra bizim üçün çətin oldu”.

S.Abasov Rezabalaya qarşı qayda pozuntusunu belə şərh edib: “Hakim görməyə bilər. Bəs VAR hara baxır? Hakim atmosferə düşə bilər. Oyun çox dayanırdı. Əlavə vaxt çox olmalı idi. Bilmirəm bilərəkdən etdi, ya yox”.